Үндэһэн хэлэнүүдые болон угсаата соёлой шэглэлтэй бусад зүйл шудалалгые дэмжэхэ талаар Улас түрын «Бэлиг» түбэй хинан заhалгын-хэблэлэй таhагай дарга Оюна Цыцыкова «БуряадФМ» арадай радиогой Орос Уласай хэблэлэй үдэртэ зорюулагдаһан шууд уулзалгада апрелиин 19-дэ хабаадаба.
Дамжуулгын хүтэлэгшэ Дулма Содномовагай эмхидхэһэн хөөрэлдөөн «Бэлиг» түбэй жэл бүриин түсэб хайшан гэжэ байгуулагдадаг бэ, ямар номууд тэрэ түсэбтэ ородог бэ, ямар номууд хэблэгдэн гарааб, 2025 ондо ямар түсэбүүд табигданхайб гэhэн асуудалнуудта зорюулагдаһан байгаа.
— «Бэлиг» түбтэ hүүлэй жэлнүүдтэ жэл бүри 30 гаран ном hудар бэлдэдгдэдэг, барлагдан гарадаг. Һургуулиин урдахи болбосоролой, эхин, дунда ба дээдэ hургуулинуудта хүүгэдэй үзэхэ, уншаха ном, ажалай дэбтэрнүүд, hуралсалай программанууд, багшанарай хэрэглэхэ онол аргын заабаринууд, хүүгэдтэ зорюулагдаhан уран зохёолой согсолборинууд, угсаатанай заншалта һурган хүмүүжүүлгэ болон багшын эрдэмээр, хүүгэдтэ зорюулагдаhан уран зохёолой, эвенк, hоёд хэлэнүүд дээрэ барлагдаhан номууд болоно. «Буряад Уласта буряад хэлэ сахин хүгжөөлгэ» гэһэн Гүрэнэй программада һомологдоһон мүнгөөр тэдэ барлагдадаг. Һургуулинууд болон бусад эмхи зургаануудые тус номуудаар хангалгада онсо анхаралаа «Бэлиг» түб хандуулна, — гэжэ Оюна Цыцыкова хөөрөө.
-Yхибүүдые, залуу үетэниие үндэhэн хэлэндэнь дуратайгаар хүмүүжүүлхын, жэнхэни буряадаараа уран хурсаар, уян нугалбаритайгаар хэлүүлжэ hургахын тула «Бэлиг» түб ажалаа эдэбхитэйгээр ябуулна. Жэлhээ жэлдэ урдамнай табигдаhан шухала түсэбүүдээ лаблан, хэжэ байhан ажалаа hаадгүй дүүргэхын тула hанаагаа хэды зобобошье, үсэд нэтэрүүгээр, бүхы юумые болзор соонь үрдижэ бүтээхые ехэтэ оролдон, ажалаа эмхидхэдэгбди. Манай суг ажалтан гүрэнэй хэмжээнэй ехэ үүргэ дүүргэнэ, болбосоролой һалбариин, тэрэнэй угсаата соёлой шэглэлэй хүгжэлтэдэ горитой ехэ хубитаяа оруулна гэхэдэ, алдуу болохогүй. Саашадаашье урдамнай табигдаһан асуудалнуудые шиидхэжэ, зорилгонуудаа бэелүүлхэмнай дамжаггүй, — гээд Оюна Цыцыкова хөөрөөгөө үргэлжэлүүлээ.
Мүн тиихэдэ Буряад Уласай Болбосоролой болон эрдэм ухаанай яаманай баталһан түсэбөөр авторнууд хэблэлдэ бэлдэһэн ажалнуудаа гаргуулхын түлөө яаха болоноб, хайшан гэжэ номууд хэблэлдэ бэлдэгдэдэг бэ, сахим хэбынь яагаад бүтээгдэдэг бэ гэжэ хөөрэлдөөн эмхидхэгдээ.
