Уласай мүрысөөнүүдэй жюриин бүридэлдэ Улас түрын “Бэлиг” түбэй Буряад хэлэ хүгжөөлгын талаар түбэй ахамад мэргэжэлтэн, һурган хүмүүжүүлгын эрдэмэй дид доктор Бадмажап Будаин хабаадана.
Эдэ үдэрнүүдтэ Буряадай багшанарай колледждо буряад хэлэн ба уран зохёолой багшанарай, мүн хүмүүжүүлэгшэдэй «Эрхим багша» болон «Эрхим хүмүүжүүлэгшэ» гэһэн мүрысөөнүүд үнгэрнэ.
«Эрхим багша» гэһэн уласай мүрысөөндэ Буряадай 14 нютагай засагай байгууламжануудай болон Улаан-Үдэ хотын 18 багша, харин «Эрхим хүмүүжүүлэгшэ» гэһэн уласай мүрысөөндэ 5 аймагай ба Улаан-Үдэ хотын 10 багша хабаадана.
«Эрхим багша» гэһэн мүрысөөнэй жюриин гэшүүн Бадмажап Будаинай тэмдэглэһээр, мүрысэгшэд бүхыдөө 5 шата дабажа гараха ёһотой: медиа-танилсалга, хэшээл, онол аргын таһалга, ангиин саг болон мастер-класс. Түрүүшын гурбан шатын дүнгүүдээр түрүүлһэн арбан хүн «Ангиин саг» гэһэн удаадахи шатада хабаадажа, тэрэнэй дүнгөөр табан эрхимүүд элирүүлэгдэхэ.
Энэ мүрысөөнэй илагша «Түрэлхи хэлэн болон түрэлхи уран зохёолой эрхим багша» гэһэн Бүхы Оросой мүрысөөндэ Буряад Уласые түлөөлхэ юм.
2024 ондо бүхы Оросой хэмжээнэй энэ мүрысөөндэ буряад хэлэн ба уран зохёолой багша Светлана Раданжаповагай илаһанай һүүлээр «Түрэлхи хэлэн болон түрэлхи уран зохёолой эрхим багша» гэһэн Бүхы Оросой мүрысөөнэй бэеэрээ хабаадаха шата мүнөө жэлэй сентябрь һарада Улаан-Үдэ хотодо үнгэргэгдэхэ юм гэжэ һануулая.
Хабаадагшадта амжалта хүсэе!
