Байгша оной мартын 17-һоо 20 болотор «Эрхим багша» болон «Эрхим хүмүүжүүлэгшэ» гэһэн мэргэжэлтэ бэлиг шадабариин мүрысөөнүүд үнгэрбэ.
Эдэ мүрысөөнүүд хадаа «Түрэлхи хэлэн болон түрэлхи уран зохёолой эрхим багша» гэһэн Бүхы Оросой нютаг можын шата болоно юм.
«Эрхим багша» мүрысөөнэй 5 шатын дүнгүүдээр гурбан түрүүшүүл шалгаржа гараа:
Саяна Будажапова (Улаан-Үдэ хотын 8-дахи һургуули), Цыбигма Лубсанова (1-дэхи лицей-интернат), Сэсэгма Галданова (Захааминай аймагай Сагаан-Мориной һургуули).
«Эрхим хүмүүжүүлэгшэ» гэһэн мүрысөөнэй 4 шатын дүнгүүдээр Бэлигма Дашиева (Улаан-Үдэ хотын «Номина» гэһэн хүүгэдэй сэсэрлиг), Евгения Бадмаева (Улаан-Үдэ хотын «Дашенька» гэһэн хүүгэдэй сэсэрлиг) болон Жаргалма Галсанова (Улаан-Үдэ хотын «Малыш» гэһэн хүүгэдэй сэсэрлиг) шангай һууринуудые эзэлээ.
«Түрэлхи хэлэн болон түрэлхи уран зохёолой эрхим багша» гэһэн Бүхы Оросой мүрысөөндэ Буряад Уласые түлөөлхэ эрхэдэ Улаан-Үдэ хотын 8-дахи һургуулиин буряад хэлэнэй багша Саяна Будажапова болон Улаан-Үдэ хотын «Номина» гэжэ хүүгэдэй сэсэрлигэй багша Бэлигма Дашиева хүртэбэ.
Илагшадые, шангай һууринуудые эзэлэгшэдые, мүн бүхы хабаадагшадые мэргэжэлтэ бэлиг шадабариин һайндэрөөр амаршалнабди! Бүгэдэндэ дундаршагүй эршэ хүсэ, зохёохы шэнэ амжалтануудые хүсэнэбди!
