Улас түрын «Бэлиг» түбэй захирал, Бүгэдэ буряадай үндэһэн соёлой эблэлэй нэгэдэхи дид-юрэнхылэгшэ Баир Балданов Залуушуулай САЙН гэһэн хуралдаанда мүнөөдэр хабаадажа, түрэл хэлэ хүгжөөлгын шэглэлээр эмхидхэгдэһэн талмайда сугларагшадые амаршалан мэндэшэлээ.
Засагай зургаануудай дэмжэлгэтэйгээр буряад хэлэ сахин хүгжөөхэ талаар ВАРК-ын болон «Бэлиг» түбэй ажал ябуулга, шэнэ түсэлнүүд тухай тобшохоноор хэлэхэһээ гадуур, түрэл нютагаймнай, түүхэтэ хэлэнэймнай ерээдүй танай, залуушуулай, гарта гэжэ тэрэ онсолоо.
Буряад хэлэ сахим юртэмсэдэ бүримэһэн оруулжа, тэрэниие хүгжөөхэ, мүнөө үеын эрилтэдэ тааруулха талаар ажал тухай хөөрэһэн байна. Гүрэн түрын хэмжээнэй «Яндекс» порталай туһа хангамжын «Оршуулагша» гэһэн хэсэгтэнь буряад хэлэ оруулха түсэлэй манай улас дотор яажа бэелүүлэгдэжэ байһан тухай мэдээсээ.
— Танай эдэбхи үүсхэл, түрэл хэлэндээ дуратай байһантнай мүнөөдэр элеэр харагдана. Нюдэндөө галтайхан, урагшаа һанаатай таанарай гарта – түрэл нютагаймнай, үндэһэн хэлэнэймнай ерээдүй. Өөһэдынгөө үри хүүгэдтэ, саашанхи үедэ мэдэсэеэ дамжуулхадатнай, эхэ хэлэмнай хэзээдэшье мартагдахагүй. Засаг баригшаднайшье, бидэнэршье, хэлэнэй талаар мэргэжэлтэд, танай һайхан үүсхэлнүүдые дэмжэжэл байхабди, — гэжэ Баир Балданов залуушуулда хандаа.
