Үнгэрэгшэ гарагай зургаанда Буряад Уласай Үндэһэтэнэй номой санда Оросой Холбоото Уласай габьяата, Буряад Уласай арадай зүжэгшэн, Буряад Уласай арадай уран зохёолшо Доржо Сультимовай «Хүлеэхэб…» гэһэн түүхэтэ романтай танилсалгын баяр ёһолол үргэн дэлисэтэйгээр үнгэрөө.
Улас түрын «Бэлиг» түбэй Гүрэнэй оршуулгын албанай хүтэлбэрилэгшэ, Орос Уласай Оршуулагшадай холбооной гэшүүн Дыжид Мархадаева суг ажалладаг аха захатанаа ээлжээтэ ехэ туйлалтаарнь амаршалаад, саашанхи ажалдань амжалта хүсөө.
Хурса гуурһатай уран зохёолшые амаршалхаяа ерэһэн Буряадай эрдэмтэд, сэхээтэд, ноёд һайд, нютагаархидынь энэ захата ехэ зохёолдонь, мүн бүхыдөө ажаябуулгадань үндэр сэгнэлтэ үгөө.
Үнэхөөрөөшье, Доржо Норбосампиловичай ажалайнь намтар харахада, бүхы наһаяа түрэл арадайнгаа соёл, түүхэ, ёһо заншалда зорюулһан габьяатай байхаһаа гадна буряад хэлэ сахин үлээхэ, хүгжөөхэ болон ерээдүйн үеынхидтэ бүрин бүтэн зандань дамжуулха гэһэн нангин шухала хэрэгтэ горитой хубитаяа оруулһаар.
Аха захатан 2020 онһоо Улас түрын «Бэлиг» түбэй Гүрэнэй оршуулгын албанда хүдэлмэрилжэ эхилһээр барагдашагүй ехэ ажал бэелүүлжэ байнхай. Бэлигтэй оршуулагша Монголой элитэ уран зохёолшодой хэдэн ехэ роман, олон тоото туужануудые монгол хэлэнһээ буряадта оршуулжа, гурбан гүрэнэй дэбисхэртэ таран ажаһуудаг буряадуудта бэе бэетэеэ танилсаха, бэе бэедээ дүтэ болохо арга олгоо.
Тиихэдээ Доржо Норбосампилович ямаршье үеын зоной һонирхожо уншахаар, илангаяа ургажа ябаа үетэндэ олон юумэ ойлгуулха, тэдэниие зүб мүрөөр хүмүүжүүлхэ үүргэтэй зохёолнуудые зорюута шэлэн оршуулдаг гэжэ онсо тэмдэглэмээр. Тиин оршуулһан туужануудайнь гурбан ном Улас түрын «Бэлиг» түбтэ хэблэгдэжэ, уласай һургуулинуудаар тараагданхай.
Суг ажалладаг аха захатанайнгаа аша габьяаень тэмдэглэжэ, Улас түрын «Бэлиг» түбэй хүдэлмэрилэгшэд Доржо Норбосампилович Сультимовые 2025 ондо «Буряад Уласай арадай уран зохёолшо» гэһэн хүндэтэ нэрэ зэргэдэ дэбжүүлһэн юм.
Номтой танилсалгын баяр ёһололой үедэ шүүмжэлэгшэд «Хүлеэхэб…» гэһэн романда үндэр сэгнэлтэ үгэһэн байха юм. Тиимэ һэн тула энэ зохёол уншагшадай зүрхэ сэдьхэл заабол хүдэлгэхэ, һонирхол татаха байха гээд багсаамжалхаар.
