Улас түрын «Бэлиг» түбэй захиралай орлогшо Оюна Забанова Буряад Уласай үндэhэтэнэй 1-дэхи лицей-интернадта үнгэрhэн «Эхэ хэлэн» гэhэн сахим номоор Улас түрын мүрысөөнэй хабаадагшадые амаршалаа.
Буряад хэлэнэй габшагай hарын заншалта хэмжээ ябуулгануудай тоодо тус хэмжээ ябуулга ороhоор үнинэй. Жэлhээ жэлдэ Буряад ороноймнай бэлигтэй бэрхэ үхибүүд тэрээндэ хабаадажа, буряад хэлэеэ хэр зэргэ мэдэдэгээ харуулдаг юм.
Оюна Забанова амаршалгын үгэ хэлэхэдээ, мүнөө сагай эрилтээр буряад хэлэеэ тоо оньhото юртэмсэдэ шэлжүүлхэ талаар «Бэлиг» түбэйхидэй ажал тухай тобшохоноор хөөрөө.
- 2025 оной hүүл багаар буряад хэлэн «Яндекс оршуулагшада» ороо. 2026 оной туршада «Бэлиг» болон «Яндекс» эмхинүүдэй хамтын ажалай дүнгүүдээр буряад хэлэмнай Яндекс-тобшолуурта ороо. Түрүүн иимэ тобшолуур андроидто оруулагдаа hэн. Энэ жэлэй сентябрь hараhаа айфондо ажаллажа эхилбэ. Мүнөө Алиса AI-тай ухаатай камера зураг дээрэ буряад текст оложо, алдуугүйгөөр, зүбөөр уншадаг болоо, — гэжэ шэнэ туйлалтанууд тухай Оюна Забанова сугларагшадта дуулгаба.
Буряад хэлэнэй сахим номоор үнгэргэгдэhэн энэ мүрысөөндэ 12 аймагай 114 үхибүүд хабаадаhан байна. Түрүү hуури эзэлhэн hурагшадта үргэмжэлэлнүүд болон мүнгэн шангууд барюулагдаа.
