Энэ долоондо Үндэhэтэнэй номой санда болоһон олон тоото хэмжээ ябуулгануудай дунда Номой дугыланай сагай хубааряар эмхидхэгдэһэн шэнэ номуудтай танилсуулганууд элбэг байгаа.
Нина Артугаевагай үхибүүдтэ зорюулжа зохёогоод, буряадаар хэблүүлһэн шэб шэнэхэн «Садхалан мэлхэй» гэжэ номтой танилсуулга үнгэргэгдөө. Тэрээндэ Улас түрын «Бэлиг» түбэй захиралай орлогшо Оюна Забанова, хинан заһалгын — хэблэлэй таһагай дарга Оюна Цыцыкова хабаадалсаа.
Хүүгэдтэ зорюулагдаhан шүлэгүүдээ үшөө нэгэ ном болгожо гаргаhан Буряад Уласай габьяата багша, Буряадай арадай ирагуу найрагша Нина Артугаевада «Бэлиг» түбэй зүгhөө энэ баяраарнь амаршалжа, гарай бэлэг барюулаа.
Буряадай улас түрын үндэhэтэнэй 1-дэхи лицей-интернадай 4-дэхи ангиин hурагшад танилсуулгын үедэ Нина Артугаевагай шүлэгүүдые сээжээр уншажа, поэдэй зохёолнуудай ульгам, бэлэн хадуугдаха байгуулгатай байhые харуулаа. Үнэхөөрөөшье, шүлэгүүдынь сээжэлдэхэдэ хүнгэн, һонирхолтой гэжэ «Садхалан мэлхэй» ном гэршэлнэ.
