Үнгэрэгшэ долооной гарагай зургаанда П.И. Чайковскиин нэрэмжэтэ Урлалай колледжын тоглолтын танхимда уран шүлэг ирагуу гоёор уншагшадай нютаг можонууд хоорондын «Дүрбэн тэнгэри» гэһэн мүрысөөнэй түгэсхэлэй баяр ёһолол үнгэрөө.
Эсэсэй энэ тоглолтодо Улас түрын «Бэлиг» түбэй захирал Баир Балданов хабаадажа, мүрысөөндэ хабаадагшадта ба харагшадта хандажа, амаршалгын үгэ хэлээ, буряадаар шүлэг ирагуу гоёор уншагшадай дунда илагшадта шангуудые барюулаа.
Оросой Холбоото Уласай арадуудай эб нэгэдэлэй жэлдэ, Буряадай арадай ирагуу найрагша Шагдар Байминовай түрэһөөр 100 жэлэй ойн баярта мүнөө жэлэй мүрысөөн зорюулагдаһан байгаа. Хабаадагшад — һурагшад, оюутад, һурган хүмүүжүүлэгшэд, уран шүлэгтэ дуратайшуул — уласай аймаг бүхэнһөө шахуу, Үбэр Байгалай хизаарһаа буужа ерэһэн байха юм.
Үлгэн һайхан тоонто нютагаа, арадуудай хани барисааниие, инаг дурые, эрэлхэг зоригтой баатарнуудые зураглаһан һайхан шүлэгүүд тайзан дээрэһээ элбэгээр зэдэлжэ, харагшадай сэдьхэлэй хүбшэргэй дайраа.
Шагдар Байминовай зохёолнууд үндэһэн хүгжэм доро уншагдаад, зарим харагшадые уяруулһаншье байха юм.
Арбан гурбадахияа эмхидхэгдэжэ байгаа энэ хэмжээ ябуулгые Буряад Уласай Болбосоролой болон эрдэм ухаанай яаман дэмжэхэдээ, буряад хэлэ сахин хүгжөөлгын Гүрэнэй программаһаа мүнгэ һомолжо, хабаадагшадые урмашуулдаг. Мүнөө жэлэй хэмжээ ябуулгада улас доторһоомнай, Үбэр Байгалай хизаарай Агын Буряадай тойрогһоо 160 хүн хабаадаа гээд тэмдэглэлтэй.














