Зэдын аймагай Цагаатайн һургуулида үнгэргэгдэһэн «Абын табан эрдэм» гэһэн Улас түрын мүрысөөнэй Гран-при шанда Буряад Уласай үндэһэтэнэй 1-дэхи лицей-интернадай бүлэг хүртэбэ.
Нэгэдэхи һуури Н. С. Сосоровой нэрэмжэтэ Цагаатайн дунда һургуулиин бүлэг эзэлээ, хоёрдохиие – Захааминай аймагай Сахирай уран һайханай шэглэлтэй интернат-һургуули. Хүрэл шанда Зэдын аймагай Петропавловкын гинмазиин түлөөлэгшэд хүртөө.
Табадахияа үнгэргэгдэһэн энэ мүрысөөндэ Захааминай, Зэдын аймагуудай болон Улаан-Үдэ хотын һургуулинуудай 5-11-дэхи ангинуудай һурагшадай 13 бүлэг хабаадаа юм. Бүлэг бүхэн 5 хүбүүдһээ бүридөө.
Тэдэ иимэ 5 шэглэлээр мүрысөө: «Эсэгын уужам ухаан» (тест шалгалта), «Эсэгын хатуу зориг» (сээжээр шүлэг уншалга), «Эсэгын бата журам»(оньһон, жороо үгэнүүд), «Эсэгэ – гэрэй түшэг, тулгуури»(дуу гүйсэдхэлгэ), «Эсэгын hургаал – алтан» (видеорепортаж).
Шэглэл бүхэнэй даабари, дууншье, шүлэгшье, оньһон болон жороо үгэшье байг, бүгэдэ эрэ хүндэ – эсэгэдэ, ахайда, аха нүхэртэ зорюулагдаа гэжэ онсололтой.
Мүрысэгшэдтэ бултандань хабаадагшын баталамжанууд, илагшын болон шангай һуури эзэлэгшэдэй үргэмжэлэлнүүд, тиихэдэ мүнгэн шангууд барюулагдаа.
