Улас түрын «Бэлиг» түбэй захирал Баир Балданов Буряад ФМ радиосубагай «Хангай Буряадни» гэһэн шууд дамжуулгада мүнөөдэр хабаадаба.
Сэдхүүлшэн Туяна Дондоковагай эмхидхэһэн энэ дамжуулгада Ахын һоёдой нютагай засагай тойрогто урда долоондо үнгэргэгдэһэн хэмжээ ябуулганууд тухай хөөрэлдөөн болоһон байна.
Улас түрын «Бэлиг» түбэй үүсхэлээр Сорогой һоёдой интернат-һургуулида зарлагдаһан суглаанда Ахын тойрогой бусад дунда һургуулинуудта һоёд хэлэ заалга яажа нэбтэрүүлхэ тухай асуудал зүбшэн хэлсэгдээ гээд Баир Балданов хөөрөө. Ганса нэрэ зүүгээд ябаха бэшэ, түрэл хэлэеэ, түүхэ соёлоо һэргээхэ һэдэлгэнүүдээ эршэдүүлжэ, ажалаа урагшань ябуулха хэрэгтэй гээд энэ суглаан дээрэ һургуулинуудай захиралнууд, багшанар һанамжалһан юм.
- Теэд хүниие, илангаяа һурагшадые хара хүсөөр баалажа, ямаршье хэлэ үзүүлхэ гээшэ хууляар хорюултай. Тиимэһээ үхибүүдэй эжы абанартай ойлгууламжын ажал һайнаар ябуулжа, дэмжэлгэдэнь хүртөөд, һоёд хэлэ заалга һургуулинуудайнгаа һуралсалай түсэбүүдтэ оруулха болонот гэжэ хандааб, — гээд Баир Балданов дамжуулгын үедэ дуулгаба.
«Ильчирын ойын» гү, али буряадараа «Элшэрэй нааданда» хабаадаад, нютагайнгаа зоной эдэбхи үүсхэл элбэгтэй байһые хаража баясаһан тухайгаа «Бэлиг» түбэй захирал радио шагнагшадта мүн лэ урматайгаар хөөрэһэн байха юм.
