Улас түрын «Бэлиг» түбтэ бэлдэгдэжэ, нара хараһан «Үндэр үүргэ» «Высокая миссия» гэһэн согсолбори Буряад Уласай Болбосоролой болон эрдэм ухаанай сайд байһан, сагһаа урид алтан дэлхэйһээ халин ошоһон Баир Жалсановай гэрэлтэ дурасхаалда зорюулагдаа. Алтан тоонто Ага нютагтань анха түрүүшын танилсуулга майн 30-да үнгэргэгдэбэ.
Үбэр Байгалай хизаарай Агын Буряадай тойрогой түб болохо Ага тосхондо оршодог «Дали ТЭ» театраар дүүрэн зон сугларжа, шэнэ номтой танилсаа. Энэ хэмжээ ябуулгада «Бэлиг» түбэй захирал, ном согсологшодой болон эрхилэгшэдэй нэгэн Баир Балданов хабаадалсаһан байха юм.
— Манай нүхэр, түрэл арадтаа, түүхэ соёлдоо, үндэһэн хэлэндээ үнэн зүрхэнһөө дуратай Баир Баторович Жалсанов амиды мэндэ ябаа һаа, майн 24-дэ тэбхэр 50 наһаяа гүйсэхэ һэн. Бүхы наһаяа эрдэм һуралсалай һалбарида, хүүгэдые һурган хүмүүжүүлгэдэ, түрэл буряад хэлэеэ сахин хүгжөөлгэдэ зорюулһан нүхэрэймнай дурасхаалда зорюулагдаһан энэ согсолбори дотор наһанайнь намтарай бүхы шатануудта хабаатай зон һанамжа дурсалгануудаа бэшээ, — гэжэ Баир Балданов сугларагшадта хөөрөө. Хэдэн бүлэгүүдһээ бүридэһэн энэ согсолбориин удхые сугларагшадта зураглан хэлэхэдээ, үе шатануудаарнь, бүлэгүүдээрнь хубаарилан харуулһан байна.
Үбэр Байгалай хизаарай, Агын Буряадай тойрогой ба Агын аймагай, Һүдэнтын һомоной болон тэндэхи дунда һургуулиин түлөөлэгшэд танилсуулгын ёһололдо хабаадалсажа, сугларагшадай урда үгэ хэлэхэдээ, Баир Баторович тухай тон дулааханаар дурсаа. Үетэн нүхэдынь – дундашье, дээдэшье һургуулида сугтаа һураһан зон мүн лэ үхибүүн хаһынгаа, оюутан наһанайнгаа эрхим найза тухай уяран үгэлөө.
Баир Баторовичай эжы Ганжитма Цыреторовна Жалсанова уулзалгын эсэстэ үгэ абажа, эхын урин сэдьхэлэй гүнһөө согсолбори бүтээгшэдтэ баярай үгэнүүдтэйгээр хандаа һэн. Хара багаһаа хойшо түрэл нютагтаа хүлөө шоройдожо, хүн болохо замдаа ямар амжалта бэрхэшээлнүүдтэй ушарһыень, хүгшэн эжынгээ хажууда, эсэгынгээ абга эгэшэнэрэй харууһан доро хүдэржэхэдөө, арадайнгаа ёһо заншалда, түүхэ соёлдо, түрэлхи хэлэндээ аргагүй дуратай болоһон гэжэ онсолоо.
Дээдэ мэргэжэл олоод, арадтаа туһатай ажал хэхэдээ, ябаһан газартаа ямбатайгаар, хүдэлмэрилһэн газартаа хүндэтэйгөөр урагшаал шармайдаг һэн. Буряад Уласай Болбосоролой болон эрдэм ухаанай сайдай орлогшоор, сайдаар ажаллахадаа, айхабтар гүнзэгы удха шанартай, холын хараа бодолтой түсэлнүүдые һанал нэгэтэнтэеэ хамта зохёон бүтээжэ, үндэһэн хэлэеэ үгы хэнгүй, саашанхи үенүүдтээ дамжуулха, сахин хүгжөөхэ хэрэгтэй горитой ехэ хубитаяа оруулһан гээд, «Үндэр үүргэ» гэһэн согсолбориин танилсуулгада нэгэнтэ бэшэ хэлэгдээ.
— Наһа барахынгаа урда тээ үнэн сэхэ нэрэеэ аршалан хамгаалхын тула хүнгэн бэшэ тэмсэл соо удаахан ябаа. Энэ ном хадаа хүбүүнэймни нэрэ хүндые бусааба гээшэ, тиимэһээ һанаамни амарба, — гэжэ Ганжитма Цыреторовна Жалсанова номтой танилсуулгын ёһолол дээрэ хэлэһэн байна.
