Үсэгэлдэр Улаан-Үдэ хотодо үнгэргэгдэһэн ВАРК-ын ээлжээтэ бэшэ хуралда Улас түрын «Бэлиг» түбэй захирал, Бүгэдэ буряадай үндэһэн соёлой эблэлэй нэгэдэхи дид-юрэнхылэгшэ Баир Балданов хабаадаа.
Нютаг можонууд хоорондын ниитын энэ хүдэлөөнэй юрэнхылэгшэ Чимит Бальжинимаев жэл хахадай туршада ябуулһан ажалайнгаа дүнгүүд тухай тоосоо. Үнгэрһэн хугасаа соод ВАРК-ын ажал нилээн эршэдэһэн байна гэжэ арад зон мэдэнэ. Гүйсэдхэхы хорооной ажал үндэр хэмжээндэ гараа. Шэнэ түсэлнүүд бэелүүлэгдэнэ, эдэбхи үүсхэл олон болоо. Хүршэ нютаг можонуудта мүн лэ ажал ябуулагдажа эхилээ гээд тэмдэглэлтэй.
Удаань эблэлэй гол дүримдэ хубилалтанууд оруулагдажа, хамаг ажаябуулгынь эшэ үндэһэн болоһон энэ данса мүнөө сагай эрилтэнүүдтэ тааруулагдаа, гүйсэдхэхы хорооной түрүүлэгшын эрхэнүүд үргэдхэгдөө.
Ээлжээтэ бэшэ энэ хурал дээрэ Баир Балданов үгэ абажа, Оросой Холбоото Уласай арадуудай хэлэнүүд тухай шэнэ хуулиин түлэб тухай хөөрэһэн байна. Жэлэй эхиндэ тэрэ зохёогдоод, нютаг можонуудаар тараагдаад, зүбшэн хэлсэлгэ шууд үнгэргэгдөө һэн. Зүрилдөөтэй зүйлнүүд түрүүшын түлэбтэ олон байжа, тэдэниие буруушааһан мэдүүлгэ дурадхалнууд үндэһэн уласуудай зүгһөө ябуулагдаһан юм. Тиин, бага-сага заһагдажа, мүлигдэжэ, үнгэрэгшэ һарын эсэстэ нютаг можонууд руу дахяад эльгээгдээ, тэрэниие һайнаар булта хаража, уншажа, һанамжа дурадхалаа элирхэйлэе гээд «Бэлигэй» захирал сугларагшадта хандаа.
