Суута ирагуу найрагша Мэлс Самбуевай түрэһөөр 85 жэлэй ойдо зорюулагдаһан тэрэнэй нэрэмжэтэ уран зохёолой шан олгохын тула үнгэргэгдэһэн мүрысөөнэй дүн татаха зүблөө эмхидхэлэй хороон үнгэргэбэ. Улас түрын «Бэлиг» түбэй захирал Баир Балданов тус зүблөөндэ хабаадаа.
Хоёр жэлэй саада тээ Мэлс Самбуевай нэрэмжэтэ Захааминай аймагай түб номой сангай энэ мүрысөө анха түрүүшынхиеэ үнгэргэхэ гэжэ үүсхэл гаргахада, Буряад Уласай Болбосоролой болон эрдэм ухаанай яаман, «Бэлиг» түб дэмжэһэн юм.
Хоёрдохи мүрысөөн заншалта ёһоор үхибүүдтэ зорюулан бэшэдэг томошуулай, мүн тиихэдэ гуурһаяа һаял туршажа байгаа үхибүүдэй дунда үнгэргэгдөө. Арадай гүн сооһоо алтан бэлигтэй ерээдүйн шүлэгшэд гарахаар байна гэжэ энэшье удаа адаглагдаа бшуу.
Үнгэрһэн зүблөөндэ хабаадаһан эмхидхэгшэд, шүүгшэд һанамжаяа хубаалдаа, мүрысөөндэ хабаадагшадые яажа олошоруулхаб, хайшан гэжэ тэдэниие урмашуулан, уран зохёолой зүргөөр яажа дахуулха, һургахаяа хөөрэлдөө.
- Мүнөө сагта, түрэл хэлэнэймнай орёохон байдалда ороод байхада, илангаяа үхибүүдэй уншаха, сээжэлдэхэ шэнэ уран шүлэг хомор болонхой. Бэшэхэшье зон хоёр гарай хургаар тоолохоор, уншагшадшье үсөөрнэ. Иимэ оршон байдалые хажуу тээһээ хараад һуужа байнгүй, ажал ябуулха, оролдохо хэрэгтэй бшуу. Шэнэ эдэбхи үүсхэл, тэрэниие гаргаһан зониие дэмжэхэ гээшэ айхабтар шухала. Мэлс Жамьянович Самбуевай нэрэмжэтэ шанда хүртэхын түлөө үнгэргэгдэһэн мүрысөөнүүд манда олон юумэ харуулна, эдэ бүгэдые бүхы талаһаань түргөөр шүүжэ, шүүмжэлжэ хараад, дары түргэн шиидхэбэри абаха хэрэгтэй, — гээд «Бэлигэй» захирал Баир Балданов тоолоно.
Мүрысөөнэй дүнгүүд мүнөө согсологдожо, шангуудые барюулгын баяр ёһололой түрүүшын шата Улаан-Үдэдэ февралиин 13-да, Мэлс Самбуевай түрэһэн үдэр, эмхидхэгдэхэ. Үндэһэтэнэй номой санда үглөөнэй 10 сагһаа баяр ёһолол эхилхэ юм.
Хоёрдохи, гурбадахи шатануудынь ирагуу найрагшын тоонтын оршодог заха холын Захааминай аймагта үргэн дэлисэтэйгээр үнгэргэгдэхэ гээд нютагаархидынь дуулгаа.
