Бүгэдэй буряадай үндэһэн соёлой эблэлэй юрэнхылэгшэ Чимит Бальжинимаевай мүнөөдэр үнгэргэһэн эмхиин Зүблэлэй президиумэй суглаанда нэгэдэхи дид-юрэнхылэгшэ, Улас түрын «Бэлиг» түбэй захирал Баир Балданов хабаадаба.
Нютаг можонууд хоорондын олониитын энэ хүдэлөөнэй шагналнууд тухай дүримэй түлэб, тэрэнэй һүлдэ тэмдэг болохо зурагай шэнэ янза, мүн тиихэдэ габьяата зониие ВАРК-ын шагналнуудар шагнаха тухай дурадхалнууд ээлжээтэ энэ зүблөөндэ зүбшэн харагдаба.
Урдахи суглаанда шагналнууд тухай асуудалнууд хэлсэгдэһэн байжа, мүнөөөдэр зүблэлэй президиумэй гэшүүд олон асуудалгүйгөөр бултыень зүбшөөжэ баталаа. Тиин, нютаг можонууд хоорондын мэдээжэ энэ хүдэлөөн «Буряад арадай үмэнэ габьаятай байһанай түлөө гэһэн» орден зохёон баталаа. Анхан сагһаа хойшо мэдээжэ хүнүүдтэ барюулагдадаг байһан иимэл нэрэтэй медаль баһал үлөө.
Тиихэдэ «Арадай дархан», «Арадай багша», «Арадай дуушан», «Арадай эмшэн», «Арадай малшан», «Арадай үльгэршэн», «Арадай тамиршан» гэһэн хүндэтэ нэрэ зэргэнүүд тогтоогдоо. Мүн баһа үргэмжэлэл, баярай бэшэгүүд габьяа ехэтэ зондо, эмхи зургаануудта ВАРК-ын үмэнэһөө барюулагдажа байха.
Бүгэдэ буряадай үндэһэн соёлой нэгэдэхи дид-юрэнхылэгшэ Баир Балданов зүбшэн хэлсэлгэдэ хабаадажа, эблэлэй һүлдэ тэмдэгэй зурагай шэнэ янза дэмжэһэн һанамжаяа элирхэйлээ.
