Үнгэрэгшэ долоондо Улас түрын «Бэлиг» түбэй захирал Баир Балданов Үбэр Байгалай хизаарай Агын Буряадай тойрог албанай хэрэгээр ошоходоо,
Бүгэдэ буряадай «Толон» сониной редакцида мэргэжэлтэ уулзалга үнгэргэбэ.
Эндэ гол шухала буряад хэлэнэй мүнөөдэрэй бэрхэшээлтэ байдал тухай дэлгэрэнгы, аша үрэтэй хөөрэлдөөн эмхидхэгдээ. «Бэлиг» түбэй ажаябуулга дээрэ үндэһэлэн, һүүлэй жэлнүүдтэ бэелүүлэгдэжэ байһан шэнэ түсэлнүүд болон ажалай ябаса тухай элидхэлнүүд шагнагдаа. Бодото жэшээнүүд дээрэ баримталагдаһан элидхэл Улас түрын «Бэлиг» түбэй Гүрэнэй оршуулгын албанай хүтэлбэрилэгшэ Дыжит Мархадаева онлайн-аргаар Улаан-Үдэһөө дурадхаһан байна.
2020 оной зун оршуулгын албанай байгуулагдахада, гансашье хуулита шиидхэбэринүүдые албан ёһонойхёор оршуулха бэшэ, ород, монгол хэлэнүүдһээ уран зохёол буряадшалха, мүн лэ һөөргэнь оршуулха арга бии болоһон юм.
— Уран зохёолой нэгэ оршон байгуулха гээшэ хэдэн гүрэнүүдээр болон нютаг можонуудаар түүхын шэрүүн эрилтээр тарашаһан арадта айхабтар ехэ удха шанартай, — гээд Баир Балданов онсолоо.
Мүн баһа тиихэдэ һүүлэй үедэ бэшэгэй хэлэндэмнай жэнхэни буряад нэрэ томьёонууд бусаагдажа байнхай.
— Зүблэлтэ засагай жэлнүүдтэ ород хэлэнһээ үлүү олоор абтаһан үгэнүүдые бии байһан буряад хэбээрнь хэлэхэ, бэшэхэ гээшэ хэлэнэймнай хүгжэлтэдэ горитой ехэ удха шанартай, — гээд «Бэлигэй» захирал тоолоно.
Тиигээд түрэл хэлэнэйнгээ ниитэ нэгэн оршон бүрилдүүлгэдэ эдэбхи ехэтэйгээр хабаадажа байгаа «Толон» сониной сурбалжалагшадые, Агаһаа ажалладаг оршуулагшадые Буряад Уласай Болбосоролой болон эрдэм ухаанай яаманаар баталагдаһан нэгэ адли нэрэ томьёонуудые үдэр бүриингөө ажалда хэрэглэхэһээ гадна, арад зон соогоо дэлгэрүүлхыень Баир Балданов уряалаа.
