Улас түрын «Бэлиг» түбэй захирал Баир Балданов буряад хэлэнэй болон соёлой «Хотын залуушуул» клубай нээлгын баяр ёhололдо хабаадаба. Түрэл хэлэеэ ба үндэhэн соёлоо хүгжөөхэ зорилготойгоор ниислэл хотын залуушуулые нэгэдүүлхэ зорилготой энэ клуб Улаан-Үдын залуушуулай түбэй дэргэдэ хотын захиргаанай үүсхэлээр байгуулагдаа гэжэ тэмдэглэлтэй.
Клубай бүридэлдэ hургуулиин ахамад ангинуудай hурагшад, оюутад, ажалладаг залуушуул, залуу гэр бүлэнүүд болон бусад зон орохо аргатай.
Эндэ буряад хэлэнэй хэшээлнүүд, үндэhэн соёлой зүйлнүүдтэй танилсалга эмхидхэгдэхэ. Мүн тиихэдэ түрэлхи хэлэндэнь залуу үетэниие дадхааха, hонирхуулха хэмжээ ябуулганууд, элдэб мүрысөөнүүд үнгэргэгдэхэ юм.
Үндэhэн урлалай маягаар гоёолто шэмэглэлтэй шэнын оршон байдал зохёогдожо эхилэнхэй. Ахамад үетэниие «Хотын залуушуул» ажаябуулгадаа эдэбхитэйгээр хабаадуулжа, үенүүд хоорондын холбоо барисаа бэхижүүлхэ зорилготой.
- Айхабтар ехэ удха шанартай үйлэ хэрэг бүтэжэ байна. Залуушуулнай, таанар — манай халаамнай, арадаймнай ерээдүйе зохёон байгуулха зон болонот, — гээд клуб нээлгын ёhололдо үгэ хэлэхэдээ, «Бэлиг» түбэй захирал тэмдэглэhэн байха юм.
Элинсэг хулинсагаймнай энэ болотор бөөмэйлжэ асарhан сэгнэшэгүй ехэ баялигаа — түрэл хэлэеэ, түүхэ соёлоо шэнгээн абажа, саашанхи үенүүдтээ дамжуулан үгэхэ гээшэ гол зорилготнай болоно, харин бидэ шадал соогоо тандаа туhалхабди гэжэ тэрэ хэлээ.
«Бэлиг» түбтэ бэлдэгдэжэ хэблэгдэhэн буряад хэлэнэй толинуудые, hүүлэй үедэ эндэ зохёогдоhон сахим хэрэгсэлнүүд руу, тэрэ тоодо «Яндекс Оршуулагша» руу, «Номто», «Бодол» сайтнууд руу шэлжэн орохо QR-тэмдэгүүдэй зурагуудые «Хотын залуушуул» клубта Баир Балданов бэлэглэhэн байна.
