«Буряад ТВ» субагай буулгаһан «Харанхы» гэжэ түрүүшын буряад телесериалтай танилсуулгын ёһололдо Улас түрын «Бэлиг» түбэй захирал Баир Балданов хабаадаба.
Буряад Уласай зохёохы ажалтай сэхээтэн олоной түлөөлэгшэд, засагай зургаануудай алба хаагшад түрүүшын сериалай танилсуулгада байлсажа, нэгэдэхи хэсэгыень хараад, һанамжаяа элирхэйлхэдээ, шэнэ киногой харагшадта һайшаагдахыень хүсөө.
Түрүүшын буряад телесериал Улаан-Үдэдэ, Хурамхаанай аймагта буулгагдаhан байна. Мэргэжэлтэ зүжэгшэдтэй хамта хүдөөгэй юрын зон түлбэригүйгөөр хабаадалсаа, «Барис» хамжаан эбээн тэдхэгшэ болоhон байха юм.
- Түрүүшын серииень харан сасуугаа, зохёогшодой гүнзэгы хэдэн бодол ойлгохоор. Түрэл хэлэеэ сахин үлөөжэ, ерээдүйн үенүүдтэ дамжуулха гэһэн гол бодолһоо гадуур залуу үетэниие угсаата арадайнгаа заншалнуудые баримталан, зүбөөр хүмүүжүүлэн һургаха удхатай, мүнөө үеын «харанхы» ябадалнуудай харша нүлөө тобойсо харуулһан кино болоо, — гээд Баир Балданов тэмдэглээ.
Танилсуулгын үедэ тус сериалда оролсожо, үйлэдэгшэ нюурнуудайнь дүрэнүүдые зураглан харуулжа шадаһан зүжэгшэдтэ, найруулагшада, зохёогшодто, эмхидхэгшэдтэ Буряад Уласай Толгойлогшын, Соёлой яаманай «Буряад ТВ» телесубагай баярай бэшэгүүд барюулагдаһан байна.
Түрүүшын буряад «Харанхы» телесериал «Буряад ТВ» субагта январь һарада харуулагдаха гээд танилсуулгада соносхогдоо.
