Болбосоролой болон эрдэм ухаанай яаманда үнгэргэгдэһэн һурган хүмүүжүүлгын хүдэлмэрилэгшэдэй августын заншалта хуралдаанда бэлдэхэ талаар эмхидхэлэй хорооной зүблөөндэ Улас түрын «Бэлиг» түбэй захирал Баир Балданов хабаадаба.
Һүүлэй гурбан жэлэй туршада һурган хүмүүжүүлгын һалбариин хүдэлмэрилэгшэдэй улас түрын суглаанда түрэл хүлэнүүдэй асуудалнуудаар амяарлаһан секцидэ зүбшэн хэлсэлгэ эмхидхэгдээгүй юм. Мүнөө жэл иимэ хэсэгэй зүблөө үнгэргэхэ тухай дурадхал Улас түрын «Бэлиг» түб яаманай үзэмжэдэ табижа, сайдай зүбшөөл абаһан байгаа.
— Жэл ошохо бүри түрэл хэлэнүүдые һургуулида зааха асуудал орёо боложо байна. Нэгэ талаһаа — хэлэеэ мэдэхэ һурагшадай үсөөрэлгэ, нүгөө талаһаа — гүрэнэй хэмжээндэ абтадаг шиидхэбэринүүдэй ёһоор, һургуулида түрэл хэлэнүүдые шудалалгада үгтэдэг сагай хороогдохо ушар тэдэнэй хүгжэлтэдэ айхабтар харшаар нүлөөлнэ.
Мүнөө жэлэй суглаандаа багшанартаяа, болбосоролой һалбариин хүтэлбэрилэгшэдтэй хамта энэ асуудал заатагүй зүбшэн хэлсэхэ ёһотойбди гэжэ һананаб. Гансал сагай эрхээр, нэгэ шугамаар шиидхэбэри абадаг бэшэ, харин түрэл хэлэнүүдэй, арадуудайнгаа ерээдүй тухай үнэн зүрхэнһөө һанаата боложо, зүб тээшэнь шиидхэбэри абаха зориг, харюусалгатай ноёд, дарганарые манай секцидэ хабаадуулха тухай дурадхал энэ зүблөөн дээрэ оруулааб, — гээд Баир Балданов тэмдэглэнэ.
Мүн лэ болбосоролой бүхы шатануудта буряад хэлэн хэр зэргэ шудалагданаб, тэрэнэй оршон яажа үргэдхэхэб, угсаата заншалнуудаа баримталан, хүүгэдые һурган хүмүүжүүлгэ тухай түрэл хэлэнүүдэй секцидэ хэлсэгдэхэ ёһотой гээд эмхидхэлэй хорооной суглаан дээрэ хэлэгдэһэн байна.
