Улас түрын «Бэлиг» түбэй захирал Баир Балданов «Сибириин хэлсээн» гэһэн эблэлэй дэргэдэхи Сибириин болон Алас Дурнын арадуудай түрэл хэлэнүүдэй талаар Ажалай бүлэгэй хүтэлбэрилэгшэ Феодосия Габышеватай үнгэрэгшэ долооной эсэстэ Эрхүү хотодо уулзаба.
Уулзалгын үедэ «Оросой Холбоото Уласай арадуудай хэлэнүүд тухай» шэнэ хуулиин түлэб, дээрэ нэрлэгдэһэе Ажалай бүлэгэй май һарын һүүл багаар үнгэргэгдэхэ зүблөөндэ харагдаха асуудалнуудаар һанамжануудаа хубаалдаа. Арадуудай түрэл хэлэнүүдые һургуулида зааха, тэдэниие сахин хүгжөөхэ талаар ажалда гол анхарал хандуулагдаа.
Саха (Яхад) Уласай Эрдэмэй академиин бодото гэшүүн, түрэл хэлэнүүдые шудалалгын ба сахин хүгжөөлгын түбэй хүтэлбэрилэгшэ, профессор Феодосия Габышева Сибириин болон Алас Дурнын арадуудай түрэл хэлэнүүдэй талаар Ажалай бүлэг һүүлэй хэдэн жэлэй туршада толгойлдог юм. Тэрэнэй ударидалга доро хэлэнүүдые һургуулида заалгын талаар горитой ехэ ажал ябуулагдана. Нютаг можонууд хоорондын олимпиада, зунай лагерь эмхидхэхэ дурадхалнууд бэелүүлэгдэдэг болонхой.
— Шэнэ хуули арадуудай хэлэнүүдэй саашанхи хүгжэлтэдэ айхабтар ехэ нүлөө үзүүлхэ зэргэтэй. Тиимэһээ гүрэнэймнай үндэһэн уласуудта түлэбынь ехэ анхаралтайгаар шэнжэлэгдэнэ. Энэ һарын хуушаар үнгэргэгдэхөөр түсэблэгдэһэн зүблөөндэ манай Ажалай бүлэг мүн лэ зүбшэн хэлсэлгэ хэжэ, гэшүүдынь өөһэдынгөө һанамжа элирхэйлхэ ёһотой, — гээд Баир Балданов тоолоно.
