Буряадай гүрэнэй телевидениин «Багшын булан» гэһэн ээлжээтэ дамжуулгын буулгабарида Улас түрын «Бэлиг» түбэй захирал Баир Балданов мүнөөдэр хабаадаба.
Жэл бүри заншалта ёһоор алтан намарай хаһада улас доторнай эмхидхэгдэдэг Буряад хэлэнэй габшагай һарын хэмжээ ябуулганууд тухай, түхэреэн жэл соо болбосоролой һалбарида, һуралсалай эмхи зургаануудта хэгдэжэ байдаг ажалай дүнгүүдые согсологдодог заншал тухай мэдээжэ сэдхүүлшэн Гүнсыма Тудуповагай табиһан асуудалнуудаар хөөрэлдөөн болоо.
Мүн тиихэдэ уласхоорондын хэмжээндэ ажалаа эрхилдэг оросой «Яндекс» хамжаанай «Оршуулагша» гэһэн хэсэгтэ буряад хэлэнэй оруулагдаһан тухай мэдээсэл габшагай һарын дэнзэ болоһон Буряад хэлэнэй үдэрэй баярай суглаанда арад зондо соносхогдоһон байгаа. Энээн тухай мүн лэ дурдагдаа.
Буряад Уласай Толгойлогшо Алексей Цыденовэй дэмжэлгээр, ород хэлэнһээ буряад хэлэндэ оршуулга хэхэ ажалда мүнгэ һомолһонойнь ашаар хоёр жэл шахуу бэелүүлэгдэһэн түсэлэй үрэ дүн хадаа буряад хэлэнэй онлайн-оршуулагша бүтээхэ хэрэгэй түрүүшын шата — туршалгын бета-түхэл болоно гэжэ Баир Балданов хөөрөө.
— «Яндексын» эльгээһэн 1 сая мэдүүлэлэй 100 мянгыень оршуулхаһаа гадна, ород, буряад хэлэнүүд дээрэ үшөө 20 мянган мэдүүлэл суглуулагдаа. Дүн хамта 120 мянган мэдүүлэл болоно. Мүн тиихэдэ уласаймнай эмхи зургаануудай нөөсэдэ байһан буряад текстнүүдые бүридхэн суглуулаа һэмди. Үбэр-Байгалай хизаарай Агын Буряадай, Эрхүү можын Усть-Ордагай Буряадай тойрогуудай захиргаануудта манай сайд хандажа, буряадаар бэшэгдэһэн, сахим түхэлдэ оруулагдаһан мэдүүлэлнүүдые тэндэһээ абаабди. Тиин, хамта дээрээ буряадаар бэшэгдэһэн 2 сая үлүүтэй мэдүүлэл «Яндекс» руу ябуулагдаһан байгаа, — гээд «Бэлигэй» захирал тодорхойлоо.
Хөөрэлдөөнэй үедэ мүн лэ Багша хүнэй нангин үүргэ, тэрэнэй үндэр нэрэ хүндэ тухай хэлэгдээ. Түрэлхи хэлэеэ һайнаар мэдэхэ болоһондоо дунда ба дээдэ һургуулинуудта заалгаһан эрхим багшанартаа бүхы наһаараа баяртай ябадагби гээд Баир Балданов онсолоо.
«Багшын булан» гэһэн ээлжээтэ дамжуулга сэнхир дэлгэсэ харагшадай анхаралда ерэхэ һарада дурадхагдаха юм.
