Улас түрын «Бэлиг» түбэй захирал, Бүгэдэ буряадай үндэһэн соёлой эблэлэй нэгэдэхи дид-юрэнхылэгшэ Баир Балданов үнгэрэгшэ долоондо Хэжэнгын аймагай анхан байгуулагдаһаар 85 жэлэй ойн баярай хэмжээ ябуулгануудта хабаадажа, ВАРК-ын юрэнхылэгшэ Чимит Бальжинимаевай, ниитын хүдэлөөнэй зүблэлэй болон өөрынгөө зүгһөө амаршалга дамжуулһан байна.
Дайн дажарай дүлэн соо, эршэтэй ажалай охин соо хүнэй хойно байгаагүй хэжэнгээрхиндэ хандан, тэрэ иигэжэ тэмдэглээ:
— Хэжэнгын аймаг алишье талаараа баян гэжэ бултанда мэдээжэ. Сагай гүнһөө эхи абаһан баян түүхэтэйт, газарай гүндэ элбэгээр нюугдаһан хоморой ашагта малтамалнуудтайт. Зүгөөр эгээл ехэ ба шухала баялигтнай – нигүүлэсхы дэлгэр сэдьхэлтэй, холын хёрхо хараатай, хурса сэсэн ухаатай, ажалша бүхэриг, тэсэмгэй ба хүлеэсэтэй, абьяас бэлигтэй, эбтэй эетэй арад зон.
Аймаг байгуулха хэрэгтэ хубитаяа оруулһан, габшагай ажалаараа хүгжөөһэн, хатуу шэрүүн жэлнүүдтэ Эсэгэ ороноо хамгаалһан нютагаархидта онсо хүндэеэ мэдүүлэн, баяр баясхалантайгаар дурсанабди. Тиихэдэ мүнөө түрэл нютагайнгаа аша туһада үнэн сэхээр оролдожо ябаһан бүхы хүнүүдтэ, Эхэ оронойнгоо түлөө ами наһаяа гамнангүй, дайсанай урдаһаа бодоһон сэрэгшэ бүхэндэ доро дохинобди, — гээд Баир Балдановай барюулһан амаршалгын бэшэг дотор хэлэгдэнэ.
Үүлэгүй сэлмэг огторгой доро, үрэжэл һайтай газар дээрэ,
Табан хушуун малаар бүрхөөгдэһэн үргэн тала дайдадаа
Жаруун Хашорай субаргадаа, Шалсаана буурал баабайдаа мүргэн,
Алдарта түүхэеэ үргэлжэлүүлжэ, амгалан һуухатнай болтогой! — гэһэн үреэл табигдаа.
