Үнгэрһэн жэлэй эсэстэ аяар холын Сахалин аралһаа «Бэлиг» руумнай баярай бэшэг ерэжэ, манииешье баярлуулаа.
Буряад хэлэнэй «Ном» клубай жасые һуралсалай номуудаар хангалсаһанаймнай түлөө баяр баясхаланаа тэндэхи буряадуудай нютаг зоной ниитын эблэлэй түрүүлэгшэ Ольга Цырендоржиева мэдүүлбэ.
Нээрээшье, һүүлэй хоёр жэлэй туршада Улас түрын «Бэлиг» түб Орос гүрэнэй нютаг можонуудаар таража ажаһуудаг нютагаархидтаяа холбоо харилсаа тогтоожо, холо ойрын буряадуудай үүсхэл дэмжэхэ талаар ажал ябуулна.
Номгон далайн номин дулаахан долгёор эрьеэ эльбүүлэн байдаг Орос гүрэнэй эгээл томо олтирог дээрэ буряад угсаатан ан-бун ажаһуудаг болоһоор үнинэй. Хуби заяанай эрхэ байдалаар, хубиин хэрэгээр гү, али хүдэлмэри албанай журамаар тиишээ нүүжэ ошоод, агууехэ Эхэ оронойнгоо, олон үндэһэтэ арад түмэнэйнгөө аша туһада амжалта түгэс ажаллажа ябаха зуураа, түрэл хэлэеэ, түүхэ соёлоо, угсаата заншалаа уһанда хаянгүй, ургажа ябаа улаан бургааһадаа – үри хүүгэдөө уярма һайхан түрэлхи хэлэндээ һургаха, удха ехэтэй ууган заншалдаа дадхааха гэжэ оролдонод. Иигэжэ байхадань, яагаад туһалангйүй байхабибди даа! Бэрхэнүүдта, Сахалин аралай буряадууд!