Улас түрын «Бэлиг» түбэй бүридэлдэ ажалаа эрхилдэг Буряад хэлэ хүгжөөлгын улас түрын түбэй ахамад мэргэжэлтэн, һурган хүмүүжүүлгын эрдэмэй дид-доктор Бадмажап Будаин Улаан-Үдэ хотын буряад хэлэнэй багшанарай мэргэжэлтэ «Эрхим багша-2025» гэһэн ниислэлэй мүрысөөнэй шүүгшэдэй бүлэгэй ажалда хабаадана.
Заншалта энэ мүрысөөн мүнөөдэр, февралиин 25-да, ниислэл хотымнай 29-дэхи буряад гимназида нютагай засагай байгууламжын хэмжээндэ үнгэргэгдэнэ.
Тус мүрысөөндэ Улаан-Үдэ хотын зургаан hургуулиин буряад хэлэнэй багшанар мэргэжэлтэ шадабарияа харуулхаяа сугларбад. Хэмжээ ябуулга ниислэлэй захиргаанай Болбосоролой талаар хороон эмхидхээ.
Түрүүшын үдэр багшанар нээмэл хэшээлнүүдые үнгэргэбэ. Мүн тиихэдэ үглөөдэр, нүгөөдэр «Ангиин саг», «Онол аргын танхим» гэhэн шатануудые дабаха ёһотой юм. Эдэ хэмжээ ябуулгануудай удаа шалгарһан дүрбэн бэрхэшүүл «Хорооной түрүүлэгшэтэй хөөрэлдөөндэ» хабаадаха.
Улаан-Yдэ хотын хэмжээнэй «Эрхим багша-2025» гэhэн мүрысөөнэй илагша байгша оной март hарада үнгэрхэ улас түрын «Эрхим багша-2025» гэhэн мүрысөөндэ хабаадаха эрхэтэй болохо гээд hануулая.
Буряад Уласай Үндэһэтэнэй 1-дэхи лицей-интернадай эхин ангинуудай ба буряад хэлэнэй ба уран зохёолой багша Светлана Раданжаповагай гүрэнэй хэмжээнэй нёдондоной урилдаанда илалта туйлаһанай удаа Бүхэроссиин 2025 оной мэргэжэлтэ мүрысөөн Буряад орондо үнгэргэгдэхэ гээд тодорхойлогдоо һэн. Гүрэн түрын нютаг можонуудһаа нангин Байгалаймнай эрьедэ намартаа буужа, эрдэм бэлигээ, дүй дүршэлөө хубаалдан, хүсэ шадалаа туршахаяа бэеэ зэһэжэ байһан эрхим багшанарые угтаха харюусалгатай ехэ ажалай эхин аймагуудай, ниислэл хотын мүрысөөнүүдһээ эхилбэ гээд онсололтой.
