Буряадай мэдээжэ ирагуу найрагша Дондок Улзытуевай үхибүүдтэ зорюулжа бэшэһэн шүлэгүүдэй «Шуушы» гэһэн согсолбориин ээлжээтэ хэблэл Улас түрын «Бэлиг» түбтэ нара хараба.
Дондок Улзытуев – онсо бэлигтэй ирагуу найрагша, буряад поэзидэ уран шүлэгөөрөө хабарай амисхаал, ая гангын хангал үнэр, түрэл Шэбэртынгээ түхэл зураг асарhан, буряад хүнэй даамай гүнзэгы бодолнуудые дамжуулжа шадаһан хүн мүн.
Ирагуу найрагшын уянгата шүлэг бүхэндэнь өөрын маяг үзэгдэдэг. Үнэхөөрөөшье Дондок Улзытуев үнэн зүрхэнhөө, арюун hанаанhаа далитай хүнгөөр бэшэхэдээ, уншагша бүхэнэй зүрхэ сэдьхэл хүдэлгэмэ зохёолнуудые бүтээдэг байһан.
«Шуушы» номдо оруулагдаһан шүлэгүүдэй гол үйлэдэгшэд – үхибүүд. Уран зохёолшо тэдэнэй һонирхол, һанал бодол, ажабайдал хурса дүрэнүүдээр харуулжа шадаа. Нютаг оронойнгоо баян байгаали, арадайнгаа ёһо заншал, хүнүүдэй сэдьхэлэй байдал, нютагайнгаа шарай зураглан харуулхадаа, Дондок Улзытуев ургажа ябаһан үхибүүдтэ гүнзэгы, даамай удхатай һургаалай үгэнүүдээр хандаһан байна.
Уран зурааша Владимир Уризченкын зохидхон зурагуудаар шэмэглэгдэнхэй. Зохёолой гол удхые бүри һонор болгожо, шэнжэ шанарыень тэдэ нилээдгүй дээшэнь үргэлсөө.
Энэ ном Дондок Улзытуевай түрэлэй болохо, ирагуу найрагшын дурасхаалда зорюулагдаһан, Бэшүүрэй аймагай Шэбэртэ һууринда оршодог «Ая гангын орон» гэһэн уянгата нэрэтэй музейн захирал Светлана Банзаракцаевагай эдэбхеэр, «Бэлиг» түбэй дэмжэлгээр дахинаа хэблэгдэбэ гээд тэмдэглэлтэй.
Шэб шэнэхэн ном һургуулиин үхибүүдтэ зорюулагдаһан ушарһаа Буряад Уласай Болбосоролой болон эрдэм ухаанай яаманай баталһан түсэбөөр сахим хэбынь Улас түрын «Бэлиг» түбтэ эхинһээ эсэстээ хүрэтэр бэлдэгдэһэн байна.
Агууехэ поэдэй алтан дэлхэйдэ мүндэлһөөр 90 жэлэй ойн баярай хэмжээ ябуулгануудай түсэбтэ Буряад Уласай Болбосоролой болон эрдэм ухаанай яаманай шиидхэбэреэр оруулагдажа, «Буряад Уласта буряад хэлэ сахин хүгжөөлгэ» гэһэн Гүрэнэй программада һомологдоһон мүнгөөр «Шуушы» дахин барлагдаа бшуу. Һургуулинуудаар, номой сангуудаар энэ ном тараагдаха.
