Улаан-Үдэ хотын захиргаанай дэргэдэхи буряад хэлэнэй талаар комиссиин ээлжээтэ зүблөөндэ «Бэлиг» түбэй хүтэлбэрилэгшэд хабаадаба.
Хэдэн элидхэл шагнагдажа, хэгдэжэ байһан ажалай зарим тэды дүнгүүд согсологдоо. Болбосоролой, унаа тээбэриин болон эд хэрэглэлгын һалбаринуудта, ниитын оршондо буряад хэлэнэй мүнөө үеын байдал тухай хотын захиргаанай хороонуудай хүтэлбэрилэгшэд хөөрөө.
Һүүлэй хоёр жэлэй туршада гүрэнэй зиндаатай буряад хэлэнэй байдал уласай ниислэлдэ һураггүй дээрэ болоо гэжэ зүблөөндэ хэлэгдэһэн байха юм.
Ниислэл хотын нютагай засагай хүтэлбэри доро үнгэргэгдэдэг хэмжээ ябуулгануудай үрэ дүн эли тодо болонхой. Нюдэндэ харагдаха, шэхэндэ дуулдаха юумэн олошороо. Буряадаар бэшэгдэһэн самбар болон соносхолнууд эмхи зургаануудай байшангуудта үлгэгдөө, ниитын унаагай буудалнуудай нэрэнүүдэй буряадаар хэлэгдэхэнь олошороо.
Болбосорол тухай холбоото уласай хуулитай зохилдуулагдан, һургуули, сэсэрлигүүдтэ буряад хэлэ заалга эмхидхэгдэнэ.
— Хэгдэжэ байһан ажалай хэды ехэшье һаа, хотын һургуулинуудта буряад хэлэ заалгын, хэшээлнүүдэй тоо олошоруулха талаар зүбшэхэ асуудалнууд шиидхэгдээгүй байһан зандаа. Болбосоролой болон эрдэм ухаанай яаманда сайдай хүтэлбэри доро хиналтын хорооной мэргэжэлтэдэй хабаадалгатайгаар тусхай суглаа үнгэргэжэ, орёо асуудалнуудта харюу олохо хэрэгтэй, энээн тухай асуудал табигдаа — гээд «Бэлиг» түбэй захирал Баир Балданов зүблөөнэй һүүлдэ тэмдэглээ.
