Буряад Уласай Толгойлогшын дэргэдэхи буряад хэлэнэй талаар комиссиин гэшүүн, Улас түрын «Бэлиг» түбэй захирал Баир Балданов «БуряадТВ» телесубагай Үбэр Байгалай хизаартахи түлөөлэлгэтэ газарай нээлгын баяр ёһололдо хабаадаба.
Агын Буряадай тойрогой түб Ага тосхондо түрүүшын үндэһэн буряад телесубагай түлөөлэлгэтэ газар үнгэржэ байгаа долоондо баярай оршон байдалда нээгдэһэн байха юм. Буряад Уласай Толгойлогшын болон Засагай газарай захиргаанай даабаряар Баир Балданов ошожо, тус ёһололдо хабаадалсажа, амаршалга болон бэлэгыень дамжуулаа.
— Гурбан гүрэндэ, Оростоо гурбан нютаг можодо ажаһуудаг буряад арадай түүхэдэ ехэ удха шанартай хэрэг бүтэбэ. Түрэл хэлэнэймнай хүгжэлтэдэ энэ үйлэ хэрэг айхабтар ехэ удха шанартай. Бэе бэеынгээ ажабайдал, ажал хэрэг, амжалта, шиидхэгдээгүй асуудал тухай һонинуудые шууд хаража, дуулажа байха гээшэ арад зониие мэдээсэлэй аргаар нэгэдүүлһэн ушар болоно. Энэ мүн лэ гүнзэгы удхатай, — гээд Баир Балданов «БуряадТВ» субагай сэдхүүлшэнтэй Агада хөөрэлдэхэдөө онсолоо.
«Бэлигэй» захиралай һанамжаар, Буряад Уласһаа ондоо тээ ажамидардаг буряад зоной үндэһэн соёлой мүн хэлэнэй талаар эрилтэнүүдые хангалгада улас түрэ һаналаа табидаг гэһэн «Буряад Уласай арадуудай хэлэнүүд тухай» хуулида бэшэгдэһэн шухала зүйл бэелүүлэгдэжэ байна.
— Буряад Уласай Толгойлогшо Алексей Цыденов буряад хэлэнэй комиссиие анха түрүүшынхиеэ өөрынгөө дэргэдэ байгуулаад, өөрөө тэрэниие сэхэ хүтэлбэрилдэг болоһон юм. Тиихэдээ түрэл хэлэнэйнгээ, үндэһэн арадай түүхэ соёл, ёһо заншал һэргээхэ хэрэгтэ горитой нүлөө үзүүлнэ, — гэжэ Баир Балданов тэмдэглэбэ.
Мүн тиихэдэ Үбэр Байгалай хизаарай, Агын Буряадай тойрогой хүтэлбэрилэгшэдэй энэ хэрэг дэмжэжэ бүтээлсэһэниинь аргагүй сэнтэй гэжэ онсолоо.
