Улас түрын «Бэлиг» түбэй хинан заһалгын-хэблэлэй таһагай дарга, хэлэ бэшэгэй эрдэмэй дид-доктор Оюна Цыцыкова мэдээжэ ирагуу найрагша, Оросой Холбоото Уласай болон Буряад Уласай соёлой габьяата хүдэлмэрилэгшэ, Орос Уласай Сэдхүүлшэдэй холбооной гэшүүн Николай Шабаевтай хамта Буряадай радиогой «Cэхэ руунь хэлсэе» гэһэн шууд-дамжуулгада хабаадаба.
«Сэхэ руунь хэлсэе» гэһэн дамжуулга хүтэлэгшэ Дарима Дамбаевагай эмхидхэһэн хөөрэлдөөн байгша оной мартын 16-да Буряадай Үндэһэтэнэй номой санда «Бэлиг» түбэй үнгэргэһэн Оросой уран зохёолшо Виктор Слипенчугай гурбан номтой танилсалга тухай асуудалнуудта зорюулагдаһан байгаа.
Николай Шабаевай үүсхэлээр «Бэлиг» түбтэ бэлдэгдэн нара хараһан Виктор Слипенчугай «Амтатай шампанска», «Энеэдэг хүүхэлдэй», «Абяагүй байлгын гал» номууд тухай дэлгэрэнгыгээр Оюна Цыцыкова хөөрэхэдөө, богонихон үгүүлэлнүүдэй, туужануудай анха түрүүшынхиеэ буряад хэлэндэ оршуулагдаһан ушар тэмдэглээ.
Үшөө тиихэдэ хамта дээрээ 6000 хэһэгээр барлагдаһан номууд Буряад Уласай һуралсалай эмхи зургаануудаар түлбэригүйгөөр тараагдахаһаа гадуур, хүршэ Агын болон Усть-Ордагай Буряадай тойрогуудай һургуулинууд руу эльгээгдэхэ тараагдаха гээд онсолоо.
Тэрээнһээ гадна эхинһээ эсэс хүрэтэр яажа бэлдэгдэдэг, ямар мэргэжэлтэдэй хүсөөр бүтэдэг тухай хөөрэhэн байна.
Мүн тиихэдэ уласхоорондын хэмжээндэ ажалаа эрхилдэг оросой «Яндекс» хамжаанай «Оршуулагша» гэһэн хэсэгтэ буряад хэлэнэй оруулагдаһан тухай, энэ түсэлэй хэр ябуулагдажа байһан тухай хүтэлэгшын асуудалда богонихоноор харюусаа.
Радио шагнагшадай һонирхол татамаар энэ асуудалнуудта тодо, дэлгэрэнгы харюунууд үгтөө гээд тэмдэглэлтэй.
