Үнгэрэгшэ гарагай долоондо Улас түрын «Бэлиг» түбэй мэргэжэлтэд Бүгэдэ Буряадай «Эрдэм» диктант бэшэбэ.
Цырен Шагжинай «Верка» гэжэ хөөрэлгэһөө хэһэг захиралай орлогшо, хэлэ бэшэгэй эрдэмэй дид-доктор Оюна Забанова уншаa.
Түрүүшынхиеэ ажал дээрээ «Эрдэм» диктант бэшэһэн «Бэлиг» түбэй мэргэжэлтэд эрхим үрэ дүн харуулжа, «hайн»гэһэн сэгнэлтэһээ доошо сэгнэлтэ абаһан хүн үгы байгаа.
Бүхэдэлхэйн энэ хэмжээ ябуулгада хабаадажа, диктант бэшэдэг зомнай гансашье өөһэдынгөө эрдэм мэдэсэ шалгана бэшэ, харин түрэл хэлэндээ үнэн зүрхэнһөө дуратайгаа, үндэһэн арадайнгаа, үлгы нютагайнгаа ерээдүйн түлөө һанаагаа зобожо ябаһанаа гэршэлнэ.
- Бидэ, «Бэлиг» түбэй мэргэжэлтэд, түрэл хэлэнүүдтэй холбоотой ажал үдэр бүри хэдэг һэн тула, үүргыень ойлгонобди. Дүнгүүднай яһала һайн байба. Энээндэ баярлахаар, — гэжэ түбэй захирал Баир Балданов тэмдэглээ.
