Улас түрын «Бэлиг» түбтэ хэблэгдэһэн «Бэлигэй арюун юртэмсэ» гэһэн номтой танилсуулга Д.З. Жалсараевай нэрэмжэтэ Хориин аймагай түбэй номой санда мүнөөдэр үнгэргэгдөө.
«Бэлиг» түбэй зүгһөө энэ хэмжээ ябуулгада Хинан заһалгын-хэблэлэй дарга, хэлэ бэшэгэй эрдэмэй дид-доктор Оюна Цыцыкова хабаадаhан байха юм.
Буряадай АССР-эй габьяата багша, РСФСР-эй арадай гэгээрэлэй эрхимлэгшэ, мэдээжэ багша, hурган хүмүүжүүлэгшын хүнгэн бэшэ ажалда бүхы наһаяа зорюулһан бэлиг ехэтэй Сэсэг Цыреновна Цыбановагай дурасхаалда зорюулагдаhан энэ согсолбори дүй дүршэлтэйнь, уг гарбалтайнь, суглуулһан дансануудтайнь болон гар бэшэгүүдтэйнь танилсуулна.
Буряад Уласай Болбосоролой болон эрдэм ухаанай яаманай баталһан түсэбөөр Улас түрын «Бэлиг» түбтэ тэрэ бэлдэгдэжэ, энэ хабар нара хараа һэн гээд һануулая.
Согсолон бүридхэгшэнь — мэдээжэ ирагуу найрагша, уран зохёолшо, Оросой Холбоото Уласай габьяата, Буряад Уласай арадай зүжэгшэн, гүрэнэй Уран зохёолшодой ба Сэдхүүлшэдэй холбоонуудай гэшүүн Чингис Гуруев.
Шэнэ номтой танилсуулгада үгэ хэлэһэн хүн бүхэн Сэсэг Цыреновна багша тухай дулааханаар дурсажа, эрдэм мэдэсынь оёоргүй гүнзэгые, баян дүй дүршэлыень онсолоо, найруулан зохёохо абьяас шадабаритай, үхибүүдтэ урин налгайгаар хандадаг энэрхы дэлгэр сэдьхэлтэй байһые тэмдэглээ.
Номойнь мүндэлһэн ушараар согсологшо Чингис Гуруевые амаршалаад, Оюна Цыцыкова тэрээндэ «Бэлиг» түбэй үмэнэhөө баярай бэшэг барюулаа. Мүн Хориин аймагай номой санда «Бэлигэй арюун юртэмсэ» номой 5 шэрхэг бэлэглээ.
Уулзалгын түгэсхэлдэ Чингис Гуруев үгэ хэлэхэдээ, Буряад Уласай Болбосоролой болон эрдэм ухаанай яаманда, Улас түрын «Бэлиг» түбэй хүдэлмэрилэгшэдтэ баяр баясхалан хүргөө.
