«Бэлиг» түбэй ахамад мэргэжэлтэн, һурган хүмүүжүүлгын эрдэмэй дид-доктор Бадмажап Будаин «Буряад ФМ» радиосубагай сэхэ дамжуулгада хабаадажа, Доодо Оронгын Нарhа-Толгой hууринhаа уг гарбалтай «Монголой Ушинский» гэжэ суурхаhан багша, эрдэмтэн, олониитын ажаябуулагша Базар Санжиевич Ишидоржин тухай шагнагшадта хөөрэбэ.
Байгша оной апрелиин 24-дэ «Буряад ФМ» -дэ Ивалгын буряадуудай үдэр тохёолдожо, буряад арадай бэлигтэй бэрхэ хүбүүн болохо Базар Ишидоржинай түрэhөөр 125 жэлэй ойдо зорюулагдаhан хөөрэлдөөн болобо. Тэрэнэй намтар тухай Бадмажап Будаин хэлэхэдээ, 1920-ёод онуудай эхеэр Базар Санжиевич Цыбен Жамцарано хоёр Элбэг-Доржо Ринчинотой хамта Бурревкомой даабаряар Монгол гүрэн руу ошоhон байна гэжэ тэмдэглээ.
— Тэрэ сагhаа хойшо Базар Санжиевичай ажаябуулга Монгол Уласай болбосоролой, эрдэм ухаанай hалбаритай нягта холбоотой байгаа. Энэ hалбариин хүгжэлтэдэ аргагүй ехэ хубитаяа оруулhан. Монгол Уласта мүнөөшье болотор Базар Ишидоржиной нэрые мэдэдэг, ехэ хүндэтэйгээр хандажа, Ишдорж багша гэжэ нэрлэдэг байна. Олон шабинарайнь тоодо бүхы дэлхэйдэ мэдээжэ Ц. Дамдинсүрэн, Ш. Лувсанвандан, Ш. Нацагдорж болон бусад эрдэмтэд ороно, — гэжэ Бадмажап Будаин онсолоо.
1936 ондо нютагаа бусаад, Москвада СССР-эй харилсаанай замуудай Арадай комиссариадай дэргэдэхи техническэ курснуудай түбтэ оршуулагшаар ажаллажа байтараа, 1937 ондо хардалгада орожо, саазалуулагдаhан юм. 1957 ондо Базар Санжиевич Ишидоржиной нэрэ сагааруулагдаhан гэжэ шагнагшад тус хөөрөөнhөө мэдэбэ.
Базар Ишидоржиной Буряад орон дотороо мэдээжэ бэшэ байhан тулань, нэрыень мүнхэлхэ зорилготойгоор нютагтань дурасхаалай самбар тодхохо, Оронгын дунда hургуулида элдэб хэмжээнүүдые, тэрэ тоодо эрдэмэй хуралдаа эмхидхэхэ тухай дурадхалнуудаа Бадмажап Будаин шагнагша олоной һонорто элирхэйлээ.
Монгол угсаатанай эрдэм болбосоролой һалбарида горитой хубитаяа оруулhан бэлигтэй бэрхэ хүнүүдэй нэрэ мартагдаха ёhогүй.
