Буряад хэлэ сахин хүгжөөхэ талаар суг ажал ябуулга тухай хэлсээн Буряад Уласай болон Эрхүү можын Засагай газарнуудай хоорондо Эрхүү хотодо баталагдаа.
Буряад Уласай Толгойлогшо Алексей Цыденов Эрхүү можын Амбан захирагша Игорь Кобзев хоёр айхабтар ехэ удха шанартай энэ хэлсээндэ гараа табиһан байха юм.
Тус хэлсээнэй зүйл хадаа буряад хэлэ сахиха болон дэбжэлтэтэй хүгжэлтыень хангаха, болбосоролой ба соёлой ниитэ нэгэн орон зай байгуулха зорилгоор бэелүүлдэг хамтын ажал болоно.
Хоёр нютаг можонуудта ажалладаг болбосоролой, соёлой болон тамирай эмхи зургаануудта буряад хэлэ болон уран зохёол зааха талаар зубшэн тааруулһан бодолго бэелүүлэгдэхээр хараалагдаба.
Буряад хэлэнэй болон уран зохёолой һуралсалай номуудые ба һуралсалай-онол аргын, уран һайханай, эрдэм ухаанай ном һудараар һургуулинуудые хангалгын, мүн тиихэдэ багшын ажалтаниие, буряад хэлэ бэшэгэй, уран зохёол шэнжэлэлгын, сэдхүүлэй ба оршуулын талаар мэргэжэлтэдые бэлдэхэ ба шэнээр һургаха асуудалнуудаар хамтын ажал ябуулха тухай хэлсээн дотор хэлэгдэнэ, — гээд, түлэбыень бэлдэһэн «Бэлиг» түбэй мэргэжэлтэд мэдээсээ.
Буряад Уласай Толгойлогшо түрүүтэй хүтэлбэрилэгшэдэй бүлэг энэ долоондо Эрхүү можо албанай хэрэгээр ошожо ажаллаа. Тиихэдээ ниигэмэй — эдэй засагай, эрдэм ухаанай — техникын ба соёлой талаар 2022-2025 онуудта суг хамта эрхилхэ ажаябуулга тухай хоёр нютаг можын засагай газарнууд хоорондын хэлсээнэй бэелүүлгэ тухай суглаа үнгэргэжэ, зүбшэн хэлсэһэн байха юм.
Мүн баһа хоёр нютаг можын дээдын хүтэлбэрилэгшэд Усть-Ордагай Буряадай тойрог хүрэһэн байна.
