Ивалгын аймагай һурган хүмүүжүүлгын һалбариин хүдэлмэрилэгшэдэй августын заншалта суглаанай нэгэ хэсэг боложо, Һужаагай дунда һургуулида үсэгэлдэр үнгэргэгдэһэн буряад хэлэнэй багшанарай уулзалгада Улас түрын «Бэлиг» түбэй захирал Баир Балданов хабаадаба.
Үнгэрһэн һуралсалай жэлэй туршада хэгдэһэн ажалаа, туйлаһан амжалтануудаа шүүмжэлхы удхатайгаар шэнжэлжэ, удхатай зүбшэн хэлсэлгэ һурган хүмүүжүүлэгшэд үнгэргөө. Аймаг дотор ажалладаг түрэл хэлэнэй багшанарай нэгэдэлэй дарга Виктория Найдановагай хүтэлбэри доро хахад үдэрэй туршада ашаг үрэтэй хөөрэлдөөн болоо.
Буряад хэлэнэй багшанарай мэргэжэлтэ «Эрхим багша-2025» гэһэн мүрысөөнэй лауреат болоһон Сотниковын дунда һургуулиин буряад хэлэнэй багша Светлана Логинова энэ хэмжээ ябуулгада хабаадаһан тухайгаа шэнжэлхы удхатай тобшолол хээ.
Үндэһэн соёлой-болбосоролой оршон байгуулха арга болгожо, түсэл зохёон бэелүүлхэ ажаябуулга тухай Поселиин һургуулиин захиралай орлогшо Юлия Шагжиева, багшанар Ирина Цыренова Эржэн Дугарова гурбан хөөрөө.
Уригдаһан айлшан, болбосоролой болон аралжаанай «Ресурс» түбэй хүтэлбэрилэгшэ, улас дотороо мэдээжэ Дулма Содномова үндэһэн соёлой шэглэлтэй болбосоролдо түсэл зохёохо ажал бэелүүлхэ тухай багшанарта хөөрэхэдөө, һонирхолтой туршалга үнгэргэһэн байна.
Суглаанай эсэстэ Улас түрын «Бэлиг» түбэй захирал Баир Балданов үгэ хэлэхэдээ, Оросой Холбоото Уласай арадуудай түрэл хэлэнүүдые үзэхэ, зааха талаар һүүлэй хубилалтанууд дээрэ тогтоо. Мүн тиихэдэ улас доторнай ябуулагдажа байһан буряад хэлэ сахин хүгжөөлгын горитой ехэ ажал тухай, «Бэлиг» түбэй бэлдэжэ хэблүүлдэг һуралсалай шэнэ номууд, түрэлхи хэлэеэ тоо оньһондо оруулха ажал тухай тобшохоноор хөөрөө. Сэсэрлигүүдтэ болон һургуулинуудта һуралсалай шэнэ жэлдэ түрэл хэлэ ба уран зохёол заалга ямар гуримаар эмхидхэгдэхэ тухай хабарһаа эхилээд, бүхэли зунай туршада зүрилдөөтэй асуудалнуудаар боложо байгаа зүбшэн хэлсэлгэ дээрэ тогтоһон байха юм. —
— Балшар наһанай хүүгэднай түрэл хэлэеэ балай һайн мэдэнэгүй. Угайдхадаа һургуулида тэрэниие зааха саг хороогдоһоор. Иимэ оршон байдалда үндэһэн хэлэеэ сахин үлөөхэ, ерээдүйн үенүүдтээ дамжуулха хэрэгнай айхабтар хүшэр болонхой. Танай, багшанарай, хүзүүн дээрэ гансашье бэшэг, уран зохёол зааха ажал бэшэ, түрэлхидэй гол уялганууд тохогдоо. Тиимэһээ танай гарта түрэл хэлэнэймнай хуби заяан сүм ороод байна гэхэдэ, оройдоошье алдуу болохогүй, — гээд Баир Балданов багшанарта хандаа.
Һуралсалай шэнэ жэлэй эхилжэ байһан ушараар сугларһан багшанарые «Бэлиг» түбэй захирал амаршалаад, тэсэбэри найдалтайгаар, эрхим бэрхээр ажаллаад, арадайнгаа хуби заяанда зүбөөр нүлөөлжэ, уян нугархай угсаата хэлэеэ абарха, хүгжөөхэ гэһэн харюусалга ехэтэй ажалдань амжалта хүсөө.
