Улас түрын «Бэлиг» түбэй захирал Баир Балданов «Ахын һоёдой нютагай засагай тойрог» гэһэн нютагай засагай байгууламжын Засаг дарга Анатолий Ринчиновэй тушаалдаа оролгын баяр ёһололдо хабаадаа.
Мүн тиихэдэ хадата Ахын аймагые урда жэлнүүдтэ ударидажа байһан толгойлогшонор Дамбинима Самбуев, Баир Шарастепанов, Баир Балданов гэгшэд хамтаржа, Анатолий Ринчиновтэ хандахадаа, иигэжэ тэмдэглээ:
— Түрэл нютагаа, арад зоноо ударидаха болоһон ушараартнай, тушаалдаа ороһон ёһололой баяраартнай таниие хани халуунаар амаршалнабди. Аймагаймнай байгуулгын түхэл нютагай засагай тойрог болгон хубилгагдажа, аглаг үндэр Аха нютагаймнай хүгжэлтын түүхэдэ үшөө нэгэ хуудаһан ирагдаба. Гүрэнэй хуулиин олгоһон эрхээр иимэ туршалгын түхэлдэ түрүү зэргэдэ орожо бэелүүлхэ гээшэ тон харюусалгатай хэрэг юм. Тиимэһээ Та өөрынгөө холын хараатай ухаан бодолой хүсөөр, эрдэм мэдэсээрээ, аймагайнгаа захиргаанда олон жэлдэ хүдэлмэрилжэ олоһон баян дүршэлөөрөө хубилган шэнэдхэлгын орёо дабаануудые урагшатайгаар, хүнгэнөөр дабажа гараха болонот. Энэ хэрэгтэ Танда амжалта хүсэнэбди.
Анатолий Ринчиновтэй хамта 2003-2016 онуудта ажаллаһан аймагай гурбан дарганар дүүтэн нүхэрөө, даруу зөөлэн абари зангыень, мэргэжэлтэ эрдэм шадабарииень һайн мэдэнэбди гэжэ тэмдэглээ.
— Арад зонтоёо үгэ хүүрээ ойлголсожо, эрхим бэрхээр тойрог нютагаа ударидахыетнай хүсэнэбди! Һанаһан хэрэгүүдтнай, бэелүүлхээр бэлдэһэн түсэлнүүдтнай булта һайханаар бүтэжэ, нютагаймнай хүгжэлтэдэ эрхим нүлөө үзүүлжэ байг лэ, — гэжэ амаршалаад, дурасхаалай бэлэг барюуулаа.
