Буряад үндэhэтэнэй «Алтаргана-2026» гэhэн Уласхоорондын XVI нааданай бага хэмжээнэй (эссе) зохёолой мүрысөөнэй нээлгын баяр ёhололдо Улас түрын «Бэлиг» түбэй захирал Баир Балданов мүнөөдэр хабаадаба.
Тус мүрысөөн Доржи Банзаровай нэрэмжэтэ Буряадай гүрэнэй ехэ hургуулида эмхидхэгдээ. Оросой Холбоото Уласай гурбан нютаг можын — Буряад Уласай, Эрхүүгэй можын, Үбэр-Байгалай хизаарай, мүн тиихэдэ Монгол Уласай 19 түлөөлэгшэ хабаадаhан байха юм.
16-hаа 35 хүрэтэр наhатай залуушуул, 35-hаа дээшэ наhатай зон тус тустаа хоёр бүлэг боложо хубаараад, буряад дайдын болон арадай ерээдүй ямар бэ гэhэн шэглэлээр эссе бэшэбэд. Зохёолнуудай сэдэбүүд: «Манай ерээдүй — манай гарта», «Арадай гуламтын гурбан тулга», «Бэлиг ехэтэ залуушуул — бүгэдэ арадайм баялиг».
Мүрысөөндэ хабаадагшадые мэндэшэлэн амаршалхадаа, гурбан гүрэндэ, Орос Уласай гурбан нютаг можодо, мүн бусад олон газараар таража ажамидардаг буряад угсаатанай, үндэhэн хэлэнэйнгээ ерээдүй тухай Баир Балданов hанамжаяа хэлэhэн байна.
- Үри хүүгэдтээ, аша зээнэртээ түрэл хэлэеэ, соёлоо, ёhо заншалаа дамжуулха гээшэ — энэ сэмүүн сагта ажаhууhан манай нангин уялга. Мүнөөдэр найруулха эссе зохёол соогоо энээн тухай бэшэхэ танай hанамжа сэнтэй байха, — гэжэ «Бэлиг» түбэй захирал онсолон тэмдэглээ.
