Албанай хэрэгээр Ага ошоод ябаһан Улас түрын «Бэлиг» түбэй захирал Баир Балданов Үбэр Байгалай хизаарай Засагай газарай Түрүүлэгшын орлогшын — Агын Буряадай тойрогой Захиргаанай хүтэлбэрилэгшын уялга дүүргэгшэ Ананда Дондоковтой уулзаба.
Тус хэмжээ ябуулгада Үбэр Байгалай гүрэнэй ехэ һургуулиин профессор, соёл шудалалай доктор Маргарита Гомбоева, Агын Буряадай тойрогой Захиргаанай хүтэлбэрилэгшын орлогшо Цыцыгма Найданова, ниигэмэй һалбариин талаар хүтэлбэриин даргын орлогшо Розалия Балдоржиева гэгшэд хабаадаһан байха юм.
Буряад хэлэ, үндэһэн соёл ба арадай тамирай зүйлнүүдые хүгжөөхэ талаар Үбэр Байгалай хизаарай гүрэнэй программа зохёон бэшэхэ талаар хэдэн асуудал уулзалгада зүбшэн хэлсэгдээ.
— Түрэл хэлэеэ, түүхэ соёлоо, үндэһэн тамирай зүйлнүүдые сахин хүгжөөхэ, ерээдүйн үенүүдтэ мартуулангүй дамжуулха тон шухала. Гэхэтэй хамта, тойрогһоо гадуур, нютаг можымнай бусад аймагуудта аһажамидаржа байгаа манай арадай бусад түлөөлэгшэд мартагдаха ёһогүй. Тиимэһээ хүтэлбэрилхы энэ данса зохёожо, заал һаа хизаарай хэмжээндэ баталха ёһотойбди, — гэжэ Ананда Дондоков онсолон тэмдэглэһэн байна.
Агын тойрогой захиргаанай түлөөлэгшэд айлшадтаяа хамта энэ түсэл дээрэ ажаллажа байһанаа тодорхойлон хөөрэжэ үгөө. Баир Балданов Маргарита Гомбоева хоёр бэшэгдэжэ эхилһэн программын гол шэглэлнүүдтэй тухай Агын тойрогой хүтэлбэрилэгшые танилсуулһан байха юм.
— Түргөөр хүгжэжэ байһан тоо оньһоной арга зүйн ашаар түрэл хэлэеэ сахин хүгжөөхэ түсэлнүүд Буряад Уластамнай засагай дэмжэлгэтэйгээр бэелүүлэгдэжэ эхилэнхэй. Сахим номууд ба онлайн-һургуулинуудһаа эхилээд, буряад хэлэнэй «Яндекс. Оршуулагшада» оруулааад, хэмэл ухаае хэлэндээ һургажа эхилһэн тухайгаа тойрогой хүтэлбэрилэгшэдэ хэлээб. Энэ ехэ ажалаа хамта бүтээе, танай дэмжэлгэ хэрэгтэй, — гээд Баир Балданов уулзалгын үедэ Ананда Дондоковто хандаа.
Энэ ехэ ажалай удхые ойлгожо, өөрөө сэхэ харгалзалжа байхаб гээд Агын тойрогой хүтэлбэрилэгшэ найдуулһан байна. Энэнь тон зүб, аргагүй ехэ удха шанартай хандаса болоно бшуу.
