Улас түрын «Бэлиг» түбтэ бэлдэгдэжэ хэблэгдэһэн үнгэтэ толинууд Буряад Уласай Соёлой яаманай мэдэлэй эмхи зургаан болодог Үндэһэтэнэй номой санда һая дамжуулагдаба.
Нэгэниинь — Буряад орон дотороо мэдээжэ сэдхүүлшэн, дээдэ гарай оршуулагша, Буряад Уласай Юрэнхылэгшын ба Засагай газарай захиргаанай бүридэлдэ ажалаа эрхилдэг байһан Гүрэнэй оршуулгын албанай хүтэлбэрилэгшэ ябаһан Буряад Уласай болон Оросой Холбоото Уласай соёлой габьяата хүдэлмэрилэгшэ, Хүндэлэлэй ордендо хүртэгшэ Бата-Мүнхэ Жигжитовэй «Амитад ба ургамалнуудай нэрын ород-буряад зурагта толи». Тэрээндэ ан амитадай, шубуу шонхорой, загаһадай, мододой, ургамалнуудай нэрэнүүд оруулагданхай. Толи бэлдэхэдээ, Бата-Мүнхэ Жигжитов ород, буряад, түбэд хэлэнүүдэй толинуудые хэрэглэһэн байна. Тус толи һурагшадта, оюутадта, багшанарта, сурбалжалагшадта болон бусадшье уншагшадта туһатай байха.
Үндэһэтэнэй номой санда үгтэһэн нүгөөдэ номынь — Оросой Холбоото Уласай хүмүүжүүлгын болон болбосоролой хүндэтэ хүдэлмэрилэгшэ, буряад хэлэнэй эрхим багша Эльвира Булхаровагай «Русско-бурятско-английский иллюстрированный словарь» / «Ород-буряад-англи үнгэтэ толи». Тэрээн дотор 223 ород, 234 буряад, 230 англи үгэнүүд оруулагдаһан юм. 18 сэдэбтэ хубаагдаһан үгэнүүд үнгэтэ зурагуудаар шэмэглэгдэнхэй. Энэ толи һургуулида ороодүй үхибүүдтэ ба 1-4-дэхи ангинуудай һурагшадта зорюулагдаһан.
Тус толинууд Буряад Уласай Болбосоролой болон эрдэм ухаанай яаманай баталһан түсэбөөр хэблэлдэ бэлдэгдэһэн, «Буряад Уласта буряад хэлэ сахин хүгжөөлгэ» гэһэн Гүрэнэй программаар һомологдоһон мүнгөөр барлагдаһан гэжэ тэмдэглэлтэй.
— Улас түрын «Бэлиг» түб хадаа Болбосоролой болоон эрдэм ухаанай яаманай эмхидхэн байгуулһан эмхи зургаан юм. Тиимэһээ манай түбэй хэблэлдэ бэлдэжэ, һангай мүнгөөр барлуулһан номууд гансал һургуули, сэсэрлигүүдээр тараагдадаг. Тиигэбэшье, түрэл хэлэнэй ниитэ нэгэн оршон байгуулха хэрэг бэелүүлгэдэ туһа болгон, толинуудые, уран зохёолой номуудые бүгэдэ арадтаа хүргэжэ үгэхэ ёһотойбди гэжэ бодоод, манай сайд Валерий Анатольевич Поздняковто иимэ дурадхалтайгаар хандаа һэмди. Яаманай дарга манай дурадхал дэмжээ. Тиимэһээ соёлой һалбариин эмхи зургаанууд болодог номой сангуудта энэ хоёр толи дамжуулха шиидхэбэри абтажа, яаманай захиралта гараа һэн, — гэжэ «Бэлиг» түбэй захирал Баир Балданов онсолон тэмдэглэбэ.
Урид хэлсэгдэһэнэй ёһоор, Үндэһэтэнэй номой сан толинуудые хүдөөгэй номой сангуудта дамжуулха. Тиимэһээ тус номуудтай танилсаха, хэрэглэхэ дуратайшуул нютагайнгаа номой сангууд руу ошожо уншаха аргатай.
