«Бэлиг» түбэй захиралай орлогшо, хэлэ бэшэгэй эрдэмэй дид-доктор Оюна Забанова Улаан-Үдэ хотын 29-дэхи Буряад гимназида «Оюун бэлиг» гэһэн Уласхоорондын хэмжээ ябуулга нээлгын баяр ёһололдо хабаадажа, энэ мүрысөөндэ ерэһэн һурагшадые, багшанарые амаршалаа.
Арбаад гаран аймагhаа 29 бүлгэм энэ хэмжээндэ сугларжа, буряад хэлэнэй талаар мэдэсэеэ шалгаха зорилготойнууд. Тус хэмжээ ябуулгын һонирхолтойнь гэхэдэ, бүлгэмүүд һургуули һургууляараа бэшэ, харин ондо ондоо һургуулинуудай һурагшад бүлгэм болон мүрысэнэ.
2015 онhоо холбоо харилсаа тогтоогоод, «Оюун бэлиг»мүрысөөндэ hурагшадые асаржа, арадууд хоорондын хани барисаанай хүүргэ бэхижүүлһэн, Монгол оронhоо ерэһэн Золзаяа Хумбагай мүрыcөөндэ хабаадагшадые мүн лэ амаршалаа.
- Орос Уласай арадуудай эб нэгэдэлэй жэлдэ үнгэржэ байһан энэ хэмжээ ябуулга олон үхибүүдые суглуулаа. Монгол Уласай Дарханай һургуулиин хүүгэд буряад хүршэнэртэеэ ехэ харилсаатай юм. Нэгэ үдэр танилсахадаа, мянган үдэр ханилха гэһэн монгол арадай оньһон үгэ ехэ зүб, — гэжэ хэдэн жэлэй туршада Дарханай һургуулиин захирал ябаһан Золзаяа багша тэмдэглэбэ.
Буряад хэлэнэй габшагай һарада үнгэргэгдэдэг энэ хэмжээ ябуулга «Буряад Уласта буряад хэлэ сахин хүгжөөлгэ»гэһэн Гүрэнэй программын мүнгөөр хангагдадаг юм.
