Түрэлхи хэлэн дээрэ видеобуулгабаринуудай нютаг можонууд хоорондын телевизионно 4-дэхи «Найдал»мүрысөөнэй шагнал барюулгын ёһолол үсэгэлдэр Поселиин дунда hургуулида үнгэргэгдөө.
Тус хэмжээ ябуулгада Улас түрын «Бэлиг» түбэй хинан заһалгын-хэблэлэй таһагай дарга, хэлэ бэшэгэй эрдэмэй дид-доктор Оюна Цыцыкова хабаадаhан байна.
Буряад Уласай Болбосоролой болон эрдэм ухаанай сайд Валерий Поздняковой, Улас түрын «Бэлиг» түбэй захирал Баир Балдановай болон өөрынгөө зүгһөө энэ хэмжээ ябуулгада сугларһан багшанарые, оюутадые, айлшадые тэрэ амаршалан мэндэшэлээ.
Тиихэдээ тус хэмжээ ябуулга эхэ хэлэндээ эдир наһанһаа үхибүүдэй hонирхол дээшэлүүлхэ, тэрэндээ гамтайгаар хандажа, сахижа ябаха хэрэгтэ нүлөөлхэ зорилготой гэжэ тэмдэглээ.
Дүрбэдэхи жэлээ үнгэргэгдэжэ байһан энэ мүрысөө Буряад Уласай Болбосоролой болон эрдэм ухаанай яаман дэмжэдэг юм.
«Буряад Уласта буряад хэлэ сахин хүгжөөлгэ» гэhэн гүрэнэй программаар мүнгэн тэдхэмжэ жэл бүри һомологдодог, мүнөөшье мүрысөөндэ илаһан хүүгэдые шагнаха, урмашуулха мүнгэ һомолһон байна гэжэ Оюна Цыцыкова онсолон тэмдэглээ.
