Монголой хүүгэдэй уран зохёолшон, ирагуу найрагша, сэдхүүлшэн, редактор, соёлой габьяата хүдэлмэрилэгшэ Жамбын Дашдондогой «Домогто шулуун» гэһэн ном «Бэлиг» түбтэ буряад хэлэн дээрэ нара хараба.
Мэдээжэ зүжэгшэн, уран зохёолшо, оршуулагша, Оросой Холбоото Уласай Чингис Гуруев тус ном монгол хэлэнһээ буряадшалаа.
Жамбын Дашдондог «Домогто шулуун» энэ бүтээл дотороо юһэн зэрлиг амитадые (үхэр хулгана, замба гүрбэл, алаг дааган, могой, заряа, тарбаган, доргон, үнэгэн, шоно) хүнүүд шэнгеэр дүрсэлэн, хада уулын шулуунуудтай сасуулжа бэшэһэн байна.
Ном дотор ороһон рассказ бүхэн уран зурааша Алла Павловагай үнгэтэ зурагуудаар болон сахим юртэмсын уудамһаа абтаһан гэрэл зурагуудаар шэмэглэгдэнхэй. Тиимэһээ эдир уншагшадай, дунда һургуулиин һурагшадай, багшанарай, буряад уран зохёодо дуратай зоной һонирхол заатагүй татаха байха.
Буряад Уласай Болбосоролой болон эрдэм ухаанай яаманай баталһан түсэбөөр Улас түрын «Бэлиг» түб номой сахим хэб эхинһээ эсэстэнь хүрэтэр түгэс дүүрэн бэлдээ гэжэ онсолое. «Буряад Уласта буряад хэлэ сахин хүгжөөлгэ» гэһэн Гүрэнэй программада һомологдоһон мүнгөөр барлан хэблэхэ гаргашань түлэгдөө. Хэблэгдэһэн номой шэрхэгүүд болбосоролой эмхи зургаануудаар тараагдаха.
