Буряадай мэдээжэ уран зохёолшо Эрдэни Дугаровай үхибүүдтэ зорюулагдаһан «Нэгэн, хоёр, гурба … юуб?» болон «Зун ямар үнгэтэйб» гэһэн номууд Улас түрын «Бэлиг» түбтэ нара хараба.
Эрдэни Дугаров түрэл буряад хэлэнэйнгээ хүгжэлтэдэ горито хубитаяа оруулалсажа, илангаяа үхибүүдтэ зорюулһан уран зохёолой хүгжэлтын тодо залууршан болонхой.
Гэхэтэй хамта үхибүүдэй абари зан, наһанайнь хаһа, ухаан бодолойнь хүгжэлтые хараадаа абажа, онсо өөрын маягаар уран зохёолнуудаа найруулдаг. Эхэ орон, түрэлхи хэлэн, һуралсал, арадай ёһо заншал, амитад, шубууд тухай гэхэ мэтэшэлэн элдэб сэдэбтэ хандан, мүн эдиршүүлые хүмүүжүүлгэдэ онсо хубитаяа оруулан бэшэдэг юм. Тиимэһээ зохёолнуудынь үхибүүдэй болбосоролдо тон шухала.
«Нэгэн, хоёр, гурба … юуб?» гэһэн согсолборидо тоолуурнууд оронхой. «Зун ямар үнгэтэйб?» гэһэн ном руунь зунда, зунай үнгэнүүдтэ зорюулагдаһан шүлэг оруулагдаа. Энээнһээ гадна үхибүүдэй тооложо һурахада, элдэб үнгэ мэдэхэ болоходо хэрэгтэй таабаринууд үгтэнхэй.
Үхибүүд гэртэхинээрээ хамта тус тоолуур, шүлэгүүдые уншажа, таабаринуудые таажа, сүлөө сагаа үнгэргэхэнь лабтай.
Энээхэн номууд уран зурааша Баир Ринчиновэй зурагуудаар шэмэглэгдэнхэй хадаа багашуулай анхарал заатагүй татаха байха.
Шэб шэнэхэн номууд һургуулида ороодүй үхибүүдтэ, hурагшадта зорюулагдаһан ушарһаа Буряад Уласай Болбосоролой болон эрдэм ухаанай яаманай баталһан түсэбөөр сахим хэбынь Улас түрын «Бэлиг» түбтэ эхинһээ эсэстээ хүрэтэр бэлдэгдэһэн байна.
«Буряад Уласта буряад хэлэ сахин хүгжөөлгэ» гэһэн Гүрэнэй программада һомологдоһон мүнгөөр тэдэ барлагдаба гээд тэмдэглэлтэй. Номууд болбосоролой эмхи зургаануудаар тараагдаха.
Зохёолшын уян нугархай хэлэтэй, тусхай шэнжэ байгуулгатай бүтээлнүүд хүмүүжүүлэгшэдтэ, багшанарта, гэртэхиндэ, мүн буряад уран зохёолдо дуратайшуулда һонирхолтой, хэрэгтэй, сэгнэшэгүй ехэ үүргэтэй хэрэгсэл боложо үгэхэ гэжэ найданабди.
