Үндэһэн соёлой шэглэлтэй «Урагшаа» гэһэн хуралдаанай хэмжээндэ урда долооной эсэстэ Агын Буряадай тойрогто үнгэргэгдэһэн холын хараа бодолто сессидэ Улас түрын «Бэлиг» түбэй захирал Баир Балданов хабаадаа.
Буряад хэлэ, үндэһэн соёл ба арадай тамирай зүйлнүүдые хүгжөөхэ талаар Үбэр Байгалай хизаарай гүрэнэй программын гол бодолой түсэл Агын Буряадай тойрогой захиргаанай захилаар «Бэлиг» түбэй захирал зохёожо, энэ сессидэ сугларагшадай һонорто дурадхаһан байна.
Хүршэ нютаг можодо анхан угһаа ажаһууһан Ага найман эсэгын үри һадаһад алишье сагта түрэл хэлэеэ, түүхэ соёлоо, ёһо заншалаа наринаар сахидаг, ерээдүйн үенүүдтээ дамжуулжа байд гээд бултанда мэдээжэ.
Арга зүйн, тоо оньһоной хурданаар хүгжэһэн энэ үедэ түрэл хэлэнэйнгээ ерээдүй тухай һанаагаа зобожо, Үбэр Байгалай хизаарай, Агын Буряадай тойрогой засаг баригшад тусхай данса зохёохо түсэб табинхай.
Тиихэдэ орёохон байдалда ороод байһан ушарһаань, үндэһэн хэлэеэ үргэхэ, дэмжэхэ шууд хэмжээнүүдые абаха гэжэ зүбшэн хэлсэлгэдэ хабаадагшад онсолон тэмдэглээ, тодо дурадхалнуудые оруулаа.
— Үбэр Байгалай хизаарнай үндэһэн улас бэшэ хадаа, нютаг можынь хуули тогтоомжо ондоошог. Тиимэһээ үнгэрһэн зунһаа эхилжэ, хизаарай хуулита шиидхэбэринүүдые шэнжэлэн хараад, дурадхалнуудаа бүридхэн суглуулжа, суглаанда хабаадагшадта хөөрэхэдөө, эндэһээ эхилээд, хэды жэлэй туршада бэелүүлэгдэхэ ямар данса зохёожо баталхаяа хөөрэлдэе гэжэ дурадхааб. Ехэ һонирхолтой зүбшэн хэлсэлгэ хоёр үдэрэй туршада болоо, — гээд «Бэлиг» түбэй захирал Баир Балданов тэмдэглээ.
