«Бэлиг» түбэй захирал Баир Балданов Уласхоорондын «Эрхим багша», Улас түрын «Эрхим хүмүүжүүлэгшэ» гэһэн мүрысөөнүүдэй нээлгын баяр ёһололдо хабаадаба.
Заншалта болоһон мэргэжэлтэ эдэ мүрысөөнүүдтэ Буряад Уласай, Үбэр Байгалай хизаарай һургуулинуудай багшанар, сэсэрлигүүдэй хүмүүжүүлэгшэд хабаадана.
Мүн тиихэдэ Монгол Уласай Булган аймагай Хилгантын сомоной һургуулиин монгол хэлэнэй болон уран зохёолой багшанар урилдаанда оролсонхой.
Манай Уласай багшанар сооhоо илагша боложо гарагшадынь Бүгэдэ Оросой түрэл хэлэнүүдэй болон уран зохёолой багшанарай мэргэжэлтэ мүрысөөндэ хабаадаха эрхэдэ хүртэхэ юм. Ерэхэ намар тус хэмжээ ябуулга Липецкын можодо үнгэргэгдэхөөр түсэблэгдэнэ.
Нээлгын ёһололдо үгэ хэлэхэдээ:
— Буряад Уласай Толгойлогшо Алексей Самбуевич Цыденовэй шиидхэбэреэр буряад хэлэ сахин хүгжөөлгын гүрэнэй программада һомологдоһон мүнгэн хасагдадаггүй юм, — гэжэ тэмдэглээ.
— Болборосолой болон эрдэм ухаанай сайд Валерий Анатольевич Поздняковой толгойлдог комиссиин шиидхэбэреэр мүнөө жэлэй «Эрхим багша», «Эрхим хүмүүжүүлэгшэ» мүрысөөнүүдые үнгэргэлгэдэ үгтэдэг 500 мянган түхэригтэ үшөө 300 мянган түхэриг нэмэгдээ. Энэ хадаа түрэл хэлэнэй эрхим багшанарые ба хүмүүжүүлэгшэдые дэмжэһэн үшөө нэгэ жэшээ болоно, — гэжэ тэрэ онсолһон байха юм.
Мүрысөөнүүд дүрбэн үдэрэй туршада үнгэргэгдэхэ. Түрэл хэлэ бэшэг, һурган хүмүүжүүлгын ба онол аргын талаар эрдэмтэд, урда жэлдэ мүрысөөндэ илажа гараһан багшанарһаа бүридэһэн шүүгшэдэй бүлгэм сайд Валерий Поздняковой хүтэлбэри доро хабаадагшадай мэргэжэлтэ мэдэсэ шадабари сэгнэнэ гээд тэмдэглэлтэй.
