Буряад Уласай Болбосоролой болон эрдэм ухаанай яаманда сайдай орлогшо Батор Буянтуевай хүтэлбэри доро үнгэргэгдэһэн «Эрхим багша» болон «Эрхим хүмүүжүүлэгшэ» гэһэн улас түрын мүрысөөнүүдые бэлдэжэ үнгэргэхэ талаар эмхидхэлэй хорооной түрүүшын зүблөөндэ Улас түрын «Бэлиг» түбэй захирал Баир Балданов, тэрэнэй орлогшо Оюна Забанова тус хэмжээ ябуулгада хабаабад.
Түрэл хэлэнэй багшанарай болон хүмүүжүүлэгшэдэй мэргэжэлтэ энэ мүрысөөнүүдые байгша оной март һарада нэгэмүһэн эмхидхэхээр хараалагдана. Тиихэдээ тэрэ Бүхэроссиин иимэл хэмжээ ябуулгын шэлэн абалгын нютаг можын шата болохо. Бүхы туршалгануудынь Бүхэроссиин мүрысөөнэйхитэй адли байха, улас дотор аймаг, хотонуудта шэлэн абалгын шата заабол эмхидхэгдэхэ ёһотой. «Буряад Уласта буряад хэлэ сахин хүгжөөлгэ» гэһэн Гүрэнэй программада хараалагдаһан мүнгэн яажа хубаарилагдахаб, хэдэн шатаһаа мүрысөөн бүридэхэб, ямар һургуулинууд ба сэсэрлигүүдтэ багшанар болон хүмүүжүүлэгшэд хэшээлнүүдээ үнгэргэхэб, ямар шүүгшэд тэдэниие сэгнэхэб гэхэ мэтэ олон асуудал зүбшэн хэлсэгдээ.
Заншалта ёһоороо Буряад Уласай багшанарай колледж улас түрын энэ хэмжээ ябуулга эмхидхэхэ гээд элирхэйлэгдэнхэй. Колледжын захирал, багшын эрдэмэй дид-доктор Светлана Нимбуева буряад хэлэнэй болон үндэһэн соёлой һалбариин декан, багшын эрдэмэй доктор Баирма Лхасаранова хоёр эмхидхэлэй хорооной зүблөөндэ мүрысөөнэй дүрим, сагай хубаари тухай хөөрэжэ үгөө, өөһэдынгөө дурадхалнуудые оруулаа.
Үнгэрэгшэ жэлэй гүрэнэй хэмжээнэй мүрысөөндэ Буряад Уласай Үндэһэтэнэй 1-дэхи лицей-интернадай эхин ангинуудай болон буряад хэлэнэй багша Светлана Раданжапова илалта туйлажа, Бүгэдэ Оросой энэ жэлэй урилдаанай Улаан-Үдэдэ үнгэргэгдэхэ тухай шиидхэбэри соносхогдооо һэн гэжэ һануулая. Оросой Гэгээрэлэй яаман болон арадуудай түрэл хэлэнүүдэй холбоото уласай институдтай хамта тэрэниие бэлдэлсэжэ үнгэргэхэ гээшэ – айхабтар харюусалгатай үйлэ хэрэг гээд манай уласай болбосоролой болон эрдэм ухаанай сайд Валерий Поздняков тэмдэглээ һэн. Тиихэдэ өөһэдынгөө мүрысөөниие үндэр хэмжээндэ үнгэргэжэ, һайн бэлэдхэл хэхэ шухала.
