Улас түрын «Бэлиг» түбэй захиралай орлогшо, хэлэ бэшэгэй эрдэмэй дид-доктор Оюна Забанова «Буряад ТВ» телесубагай «Жэгүүртэ хүлэг” гэhэн дамжуулгада хабаадаба.
Сибириин арадуудай аман ба уран зохёол зэргэсүүлэн э шэнжэлжэ, эрдэм ухаанай хүгжэлтэдэ горитой ехэ хубитаяа оруулһан багша, хэлэ бэшэгэй эрдэмэй доктор, профессор Саян Жимбеевич Балдановай түрэhөөр 95 жэлэй ойдо зорюулагдаhан удха ехэтэй хөөрэлдөөн тус дамжуулгада дэлгээгдээ.
«Бэлиг» түбэй захиралай орлогшо, хэлэ бэшэгэй эрдэмэй дид-доктор Оюна Забанова Доржо Банзаровай нэрэмжэтэ Буряадай гүрэнэй ехэ hургууулиин буряад болон эвенк хэлэ бэшэгэй тэнхимэй даагша, hурган хүмүүжүүлгын эрдэмэй дид-доктор Сергей Ошоровтой хамта Саян Жимбеевичэй намтар, эрдэмэй шэнжэлгын ажалнууд тухайнь, буряад уран зохёол шэнжэлхэ, шүүмжэлхэ хэрэгтэ үзүүлhэн нүлөө, мүн тэрэниие hургуулинуудта заалгын программа зохёогшо, буряад уран зохеолоор hуралсалай номуудай болон хрестоматинуудай согсологшо байhан тухайнь харагшадта хөөрэбэ.
Оюна Забанова эрдэм шэнжэлгын ажалаа профессор Саян Жимбеевич Балдановай хүтэлбэри доро ябуулhан байна. Эрдэмтэ багшынгаа шабинарые нэрлэхэдээ, Саян Жимбеевичэй эмхидхэhэн эрдэмэй hургуули тухай тобшохоноор тэрэ хөөрэһэн байна.
Сибириин олон үндэhэтэ арадуудай аман болон уран зохёол нэгэ хизаартай гэhэн багшынгаа бодолые үргэлжэлүүлжэ, мүн саашадаашье эхи hабагша татаһан эрдэмэй энэ hургуулиhаа гансашье буряад уран зохёол шэнжэлхэ бэшэ, харин тува, хакас, яхад, алтай арадуудай уран зохёол шэнжэлдэг эрдэмтэдэй урган гараһые онсолоо.
Тус интервью “Буряад ТВ” субагта декабриин 8-да гараба. Энэ дамжуулга мүн баһа ВКонтакте сүүлжээндэ хаража болохо.
Декабриин 11-дэ эрдэмтэн, хэлэ бэшэгэй эрдэмэй доктор, профессор Саян Жимбеевич Балдановай түрэhөөр 90 жэлэй ойдо зорюулагдаhан эрдэмэй хуралдаан Доржо Банзаровай нэрэмжэтэ Буряадай гүрэнэй ехэ hургууулиин үүсхэлээр үнгэрхэнь гэжэ hануулая.
