Буряадай мэдээжэ уран зохёолшо, сэдхүүлшэн, оршуулагша, гүрэн түрын ажаябуулагша Ц.Доной түрэһөөр 120 жэлэй ойн баярай хэмжээ ябуулгада Улас түрын «Бэлиг» түбэй захирал Баир Балданов хабаадажа, уран зохёолшын «Хиртэһэн һара» туужын дахин хэблэгдэһэн тухай мэдээсээ.
Ойн баярта зорюулагдаһан уулзалга уран зохёолшын түрэл нютагта, Бэшүүрэй аймагай Шэбэртэ тосхондо үнгрэгэшэ долооной эсэстэ эмхидхэгдээ юм. Ц.Доной олон тоото үри саданарай, сомоной даргын болон захиргаанайнь мэргэжэлтэдэй, дунда һургуулиин захиралай болон багшанарай, нютагаархин олоной оролдолгоор энэ хэмжээ ябуулга ехэ дулаахан оршон байдалда үнгэрөө.
- Болбосоролой болон эрдэм ухаанай яаманай шиидхэбэреэр «Бэлиг» түбтэ оройдоол гурбан һарын туршада бэлдэгдэжэ, дахяад хэблүүлэгдэһэн «Хиртэһэн һара» туужа буряад, ород хэлэнүүд дээрэ нара хараа. Буряад уран зохёолой программаар һургуулида үзэгдэдэг зохёол хадаа, энэшье удаа болбосоролой эмхи зургаануудаар тараагдаха юм, — гээд Баир Балданов тэмдэглэнэ.
Ойн баярай уулзалгада уран зохёолшын түрэлхидэй зүгһөө аша, гушанарынь – Шэбэртэ нютагай сэхээтэд, аха дүүнэр Алдар ба Аюр Гомбоевууд, Лариса Дымшеева болон бусад түлөөлэгшэд сугларагшадай урда үгэ хэлэхэдээ, элинсэг, үбгэ эсэгынгээ хуби заяан тухай һонирхолтойшье, гашуудалтайшье мэдээсэл дуулгаа.
Буряад Уласай Арадай Хуралай Түрүүлэгшэ Владимир Павлов, Бэшүүрэй аймагай засаг даргын нэгэдэхи орлогшо Марина Бадмаева, Буряадай Уран зохёолшодой холбооной түрүүлэгшэ Сергей Доржиев, Д. Банзаровай нэрэмжэтэ БГУ-гай Буряад хэлэнэй ба уран зохёолой дээдын һургуулиин буряад хэлэнэй болон зааха онол аргын тэнхим даагша Баирма Цырендоржиева, мэдээжэ ирагуу найрагша, хүгжэм зохёогшо, Буряад Уласай соёлой габьяата хүдэлмэрилэгшэ Вера Шобосоева, Шэбэртын сомоной дарга Цырен-Дондок Шоймполов гэгшэд амаршалгын үгэ хэлэжэ, хамалганай үедэ хардуулжа, оройдоол 33-тайда хосорһон арадайнгаа бэлиг ехэтэй түлөөлэгшын хуби заяан, тэрэнэй намтар, зохёохы зам тухай, үндэр наһатай болотороо амиды мэндэ ябаа һаа, хэды ехэ ажал хэхэ, ямар олон зохёол бэшэхэ байһан тухайнь бодомжолоо.
Ерэ хүрэжэ ябаһан айлшад – 1977-1985 онуудта Шэбэртын совхозой захиралаар ажаллаһан Намсарай Балданович Манзаев, багшын ажалай ветеранууд мүн лэ өөһэдынгөө һанал бодол таб-яб байса элирхэйлһэн байха юм.
Баярай уулзалгада хабаадагшад Шэбэртын һургуулиин «Тоонто» гэһэн музей, агууехэ ирагуу найрагша Дондог Улзытуевай бууса гэр — музей хүрөө.
Һургуулиин шабинарай болон багшанарай бэлдэһэн «Сэдьхэлэйнь хүсэл» гэһэн уран һайханай — хүгжэм дуута тоглолтоор хэмжээ ябуулга түгэсэһэн байна.
