«Оросой Холбоото Уласай хэлэнүүд тухай» холбоото уласай хуулин түлэб зүбшэн хэлсэхэ талаар гүрэнэй Эрдэм ухаанай болон дээдэ болбосоролой яаманай үнгэргэһэн зүблөөндэ Буряад Уласай Болбосоролой болон эрдэм ухаанай сайд Валерий Поздняковтой хамта Улас түрын «Бэлиг» түбэй захирал Баир Балданов хабаадаба.
Үнгэрһэн һарын эсэстэ энэ хуулиин түлэб гүрэнэй нютаг можонуудаар гурбадахияа тараагдажа, заһабари, дурадхалнууд хаа хаанаһаа эльгээгдэһэн байгаа. Буряад Уласай Засагай газарһаа эльгээгдэһэн дурадхалнууд бусад үндэһэн уласуудай түлөөлэгшэдэй эльгээһэн һанамжануудтай адли гэжэ зүблөөн дээрэ элирээ.
Гүрэнэй засагай зургаануудай, эрдэм ухаанай эмхинүүдэй, нютаг можонуудай түлөөлэгшэд зүблөөн дээрэ үгэ хэлэхэдээ, хуулиин түлэбөөр һанамжануудаа элирхэйлээ.
Болбосоролой болон эрдэм ухаанай сайд Валерий Поздняков зүблөөн дээрэ мүн лэ үгэ хэлэжэ, манай уласай Засагай газарһаа урид эльгээгдэһэн дурадхалнуудые дэмжэһэн байха юм.
Хуулиин түлэб саашадаа үшөө мүлигдөөд, баталан абтахаар түсэблэгдэнхэй.
