Улас түрын «Бэлиг» түбэй захирал, 2011-2016 онуудта Ахын аймагай Засаг даргаар ажаллаһан Баир Балданов Ахын аймагай анхан байгуулагдаһаар 85 жэлэй ойн баяраар, арадай һайндэр Сурхарбаан найраар аймагай ажаһуугшадые амаршалба.
Аймагай толгойлогшын уялга дүүргэгшэ Анатолий Ринчиновтэ эльгээһэн амаршалгын бэшэг дотороо:
-Арюун булагта нютагаймнай арад зон, сэдьхэлтнай Саяан уулынгаа саһата орьёл мэтэ саб сагаан, замтнай үргэн, ажалай ба ажабайдалай амжалтануудтнай үндэр! — гээд Баир Балданов нютагаархиндаа хандаһан байна.
Сэрэгэй тусхай ябуулга тухай дурдахадаа, «Эсэгэ ороноо хамгаалгын Агууехэ дайнай алдарта сэрэгшэдһээ өөрэгүйгөөр Аха нютагаймнай мүнөө үеын баатарнууд гүрэн түрынгөө эрхэ сүлөөгэй, гэр бүлэнүүдэйнгээ гэрэлтэ һайхан ерээдүйн түлөө хархис дайсадтай эрэлхэг зоригтойгоор тэмсэнэд» гэжэ «Бэлиг» түбэй захирал онсолоо.
— Алдалан унаһан сэрэгшэдэймнай алдар нэрэнүүд аймаг нютагаймнай, булган талата Буряад ороноймнай, агууехэ Орос гүрэнэймнай түүхэдэ алтан үзэгүүдээр аржыса бэшэгдээд, арад зоноймнай зүрхэ сэдьхэлдэ хэтэ мүнхэдөө үлэнэ, — гэжэ амаршалга дотор хэлэгдэнхэй.
Ойн баярай тэмдэглэгдэжэ байһан үдэр Баир Балданов түрэл аймагайнгаа айл бүхэндэ, хүн бүхэндэ элүүр мэндые, амгалан тайбаниие, аза талаан, амар жаргал хүсэн юрөөһэн байна.
