Үндэһэн хэлэнүүдые болон угсаата соёлой шэглэлтэй бусад зүйл шудалалгые дэмжэхэ талаар Улас түрын «Бэлиг» түб Эрхүү можын Усть-Ордагай Буряадай тойрогой Оһын аймагай захиргаан хоёрой хоорондо буряад хэлэ сахин хүгжөөхэ ажал хамтаржа ябуулха тухай хэлсээн баталагдаба.
«Бэлиг» түбэй захирал Баир Балданов Оһын аймагай Засаг дарга Борис Хошхоев хоёр Оһо һууринда уулзажа, тус хэлсээндэ гараа табиһан байна.
— Һүүлэй хэдэн жэлэй туршада Оһын аймагайхид түрэл хэлэеэ сахиха, хүгжөөхэ, тэрэниие сэсэрлиг, һургуулинуудтаа зааха талаар айхабтар ехэ эдэбхи үүсхэл гаргажа, горитой ажал хэжэ байнхай. Тэрэ тоодо «Бэлиг» түбтэй хамта бүтээдэг түсэл, хэрэгүүд ороно.
Аймагайнгаа бюджедтэ мүнгэ һомолжо, һургуулинуудта дуталдаһан ном һудар абана, олон тоото хэмжээ ябуулгануудые үнгэргэнэ, — гэжэ Баир Балданов онсолно.
«Бэлиг» түбэй захиралай хэлэһээр, Оһын аймагай даргаар һая болотор ажаллаһан Виктор Михайлович Мантыковай, Болбосоролой хүтэлбэриин дарга Александр Михайлович Дамбуевай хүтэлбэри доро энэ ехэ арга хэмжээнүүд амжалтатайгаар бэелүүлэгдээ.
Үнгэрһэн намарай һунгалтада илажа гараһан аймагай мэр Борис Михайлович Хошхоев урид табигдаһан һайхан зорилгонуудые бэелүүлгэ үргэлжэлүүлжэ байна.
— Манай «Бэлиг» түбтэй табигдаһан хэлсээн аймагай шэнэ даргын ажалда, түрэл хэлэнэймнай саашанхи байдалда һайн нүлөө үзүүлхэ, хүгжэлтэдэнь туһа болохо гэжэ һанагдана, — гээд Баир Балданов онсолбо.
Буряад Уласай Болбосоролой болон эрдэм ухаанай яаман нютаг можонууд хоорондын хэмжээндэ буряад хэлэ хүгжөөлгын асуудалнуудта онсо анхарал хандуулдаг гээд тэмдэглэлтэй.
