Угсаата соёлой шэглэлтэй һургуулинуулай эблэлэй Сагаалганда, Эсэгэ ороноо хамгаалагшын жэлдэ зорюулагдаһан хэмжээ ябуулга Баргажанай аймагай Сахар Хамнаевай нэрэмжэтэ Уланай дунда һургуулида урда долооной эсэстэ үргэн дэлисэтэйгээр үнгэргэгдэбэ. Тус хэмжээ ябуулгада Улас түрын «Бэлиг» түбэй захирал Баир Балданов хабаадаа.
Буряадаараа бэе бэеэ амаршалжа, уран гоёор уншажа, ирагуу һайханаар дуулажа, уян нугархайгаар хатаржа мүрысэхэһөө гадна, заншалта тэбэг сохилго, ташуур таталга ба шагай наадануудта эблэлэй болон Баргажанай аймагай һургуулинуудай шабинар шадабарияа харуулаа.
2014 ондо байгуулагдаһан ниитын энэ эмхидэ мүнөө 17 һургуули ороно. Түрэл хэлэеэ, түүхэ соёлоо, ёһо заншалаа хүүгэдтэ гүнзэгыгөөр шудалуулжа, ерээдүй сагта арадайнгаа, тоонто нютагайнгаа, Эхэ оронойнгоо хүгжэлтэдэ хубитаяа оруулха зониие һурган хүмүүжүүлхэ гээшэ — эрдэмэй эдэ гуламтануудай гол зорилго мүн.
— Оросой Юрэнхылэгшэ Владимир Путин орон доторнай ажаһуудаг арадуудай түрэл хэлэнүүдые хүгжөөлгэдэ онсо анхарал хандуулагдаха ёһотой гээд нэгэнтэ бэшэ хэлэһэн байна. Манай уласай толгойлогшо Алексей Цыденов, Арадай Хуралай һунгамалнууд, Болбосоролой болон эрдэм ухаанай яаман, аймагуудай ударидагшад буряад хэлэ хүгжөөхэ талаар горитой ажал ябуулнад. Үдэр бүри самбарай урда байжа, арбагар заахан хүүгэдые түрэл хэлэндэнь һургаха, дурлуулха талаар сэгнэшэгүй ехэ үүргэ дүүргэдэг багшанар, хүмүүжүүлэгшэдтээ доро дохинобди, — гээд Баир Балданов тэмдэглэһэн байна.
