Улас түрын «Бэлиг» түб түрэл хэлэнүүд болон түрэл уран зохёол үзэхэ талаар онол аргын дурадхалнуудые бэлдэбэ.
Һургуулинуудай түсэбүүдтэ буряад хэлэнэй болон уран зохёолой хэшээлнүүдые оруулха асуудалнууд Буряад Уласай Болбосоролой болон эрдэм ухаанай яаманда хэлсэгдээ. Зүбшэн хэлсэхэ асуудалнууд олон байгаа. Юуб гэхэдэ, 2025 онһоо сентябриин нэгэнһээ Оросой Холбоото Уласай Гэгээрэлэй яаманай захиралтаар олон шэнэ хубилалтанууд хараалагдана. Жэшээлхэдэ, байгша оной сентябрь һараһаа эхилээд, түүхын хэшээлнүүдэй долоон хоногой хэшээлнүүд 2 сагһаа 3 болотор нэмэгдэхэ, Холбоото Уласта ажаһуудаг арадуудай шажан мүргэлэй соёлой үндэһэ һуури гэһэн хэшээл 5-дахи болон 6-дахи ангинуудта заагдахаа болибо гэхэ мэтэһээ эхилээд, һуралсалай түсэбтэ хубилалта боложол байна.
Түрэл хэлэнүүдэй хэсүү байдалда ороод байха сагта буряад хэлэнэй болон уран зохёолой һургуулиин программада үгтэһэн сагынь бага болохогүйнь тулада шэнэ методическа дурадхалнууд зохёогдожо, Болбосоролой болон эрдэм ухаанай яаманай болбосоролой талаар хинан харгалзалагшадай Хорооной, мүн Буряад Уласай һуралсалай бодол нэбтэрүүлгын дээдэ һургуулиин мэргэжэлтэдтэ дурадхагдаба.
Долоон үдэрэй болзорто тэдэнэр һанамжануудаа, болон дурадхалнуудаа бэлдэжэ, оруулжа, тус данса баталагдаха гэжэ мэдүүлнэбди.
